Astana klýbynyń úshinshi otyrysynda Elbasy Nursultan Nazarbaev Qazaqstannyń Sırıa kelissózderine beıtarap qatysýshy retindegi kózqarasy týraly Avstrıa syrtqy ister mınıstri Benıta Ferrero-Valdnerdiń suraǵyna jaýap berdi. Bul týraly Qamshy.kz aqparat agenttigi sputniknews.kz málimetine súıenip habarlaıdy. 

Qazaqstan basshysy qazir álemdi alańdatyp otyrǵan mańyzdy máselelerdiń biri terorızm ekenin atap ótti. 

"Úsh másele bar. Bul – terorızm, ıadrolyq qarýsyzdandyrý jáne Soltústik Koreıa máselesi. Bul úsh máseleni álem elderi, ásirese, AQSH, Reseı, Qytaı sekildi uly derjavalar birikpeı, sheshe almaımyz. Aıtalyq, kúsh biriktirmesek,Soltústik Koreıa máselesin beıbit jolmen sheshý múmkin emes. Degenmen bul úsh derjavanyń arasynda ekonomıkalyq, saıası máseleler boıynsha kelispeýshilik bar. Sondyqtan bul bizdi alańdatady. Sırıa bizdiń óńir, bizden alys emes. Jastardy aldap-arbap, aqshaǵa qyzyqtyryp, soǵysýǵa tartyp jatyr", — dedi N.Nazarbaev.

Prezıdent sonymen qatar Astanada Sırıa kelissózderiniń jeti kezeńi ótkenin eske salyp ótti.   

"Munda soǵysyp júrgen jasaqtardyń komandırleri boldy. Quramy óte kúrdeli, pikirler ár túrli, kelissózder qıyn ótti. Biz uly jetistikterge jetemiz dep dolbar jasaýǵa bolmaıdy, alaıda alǵa jyljyp jatqanymyz sózsiz. Sondyqtan biz DAISH-pen kúreste álemge paıdaly is jasap jatyrmyz dep esepteımin. AQSH-tyń basshylyǵyndaǵy koalısıa Reseı, Túrkıa jáne Iranmen birlese jumys istep, nátıjege qol jetkizip otyr. Biz bul uıymdy jeńýdiń az-aq aldynda turmyz. Alaıda odan ári ne bolatynyn oılaý kerek", — dep túıindedi Nazarbaev.