EO-nyń  memlekettik basqarý salasyndaǵy jetekshi sarapshylary qatysýymen saýdadaǵy tehnıkalyq kedergiler men zıatkerlik menshik quqyǵy máselerine arnalǵan eki TAIEX semınary ótti dep habarlaıdy Qamshy.kz aqparat agenttigi.

İs-sharany Eýropalyq Komısıa jáne Qazaqstandaǵy Eýropalyq Odaq Ókildigi Qazaqstan Respýblıkasynyń Úkimetimen tyǵyz baılanysta uıymdastyrdy, qarjylandyrý Áriptestik quraly arqyly júrgizildi. Semınar Eýroodaq pen Qazaqstan arasyndaǵy Keńeıtilgen áriptestik pen yntymaqtastyq týraly kelisimniń  saýda jáne ınvestısıalar baptaryn júzege asyrylýyn qamtamasyz etýge baǵyttalǵan.

Astana qalasy men Qazaqstannyń basqa da óńirlerinen 115-ten astam qatysýshylar, sondaı-aq Qazaqstan Respýblıkasynyń Ulttyq ekonomıka mınıstrligi, Ádilet mınıstrligi, Investısıalar jáne damý mınıstrligi, Qarjy mınıstrligi, Joǵarǵy sot, Keden jáne Ulttyq zıatkerlik menshik ınstıtýtynyń ókilderi is-sharaǵa qatysty.

"Atalǵan is-shara Eýropalyq Odaqtyń Qazaqstanǵa Keńeıtilgen áriptestik pen yntymaqtastyq týraly kelisim usynatyn múmkindikterdi tolyq mólsherde paıdalaný úshin kómektesýge daıyn ekendigin kórsetedi. Biz naqty qadamdardy iske asyrýdamyz, ózara saýda men ınvestısıalardy aldaǵy ýaqytta kúsheıtý maqsatynda EO múshe-memleketterdiń jetekeshi sarapshylaryn memlekettik basqarý salasyndaǵy Qazaqstandyq áriptesterimen úzdik tájirıbe bólisýge shaqyrdyq," - Qazaqstandaǵy EO Ókildiginiń Basshysy, Elshi Traıan Hrıstea myrza atap ótti.

Semınar qatysýshylary Qazaqstan - Eýrazıalyq ekonomıkalyq odaq (EAEO) ortasynda qoldanyla alatyn elementterdi baǵalaý maqsatymen tehnıkalyq retteý, akredıtteý, standarttaý, metrologıa júıeleri, sondaı-aq zıatkerlik menshik quqyǵyn qorǵaý salasyndaǵy EO-nyń zańńamasy men úzdik tájirıbesi týraly aqparat aldy.