Qaraǵandyda seısenbide "dinı alaýyzdyqty qozdyrý" boıynsha qylmystyq is sotta qarala bastady dep xabarlaıdy Qamshy.kz aqparat agenttigi silteme azattyq.org-qa jasaı otyryp.

Bul is boıynsha eki adam - Qaraǵandynyń 28 jastaǵy turǵyny Mıhaıl Tkachev pen Petropavldyń 66 jastaǵy turǵyny Ýálı Álıasqarov sottalyp jatyr. Olarǵa áldebir "tyıym salynǵan" ádebıetti oqydy degen aıyp taǵylǵan. Biraq týystary jarty jyldan astam ýaqyt qamaýda otyrǵan olardyń zańǵa qaıshy ne istegenin durys túsinbeıtinin aıtady. Eki sottalýshynyń da bilimi joǵary. Álıasqarov buryn kóp jyl prokýratýrada qyzmet istegen.

Búgingi sot otyrysyna sottalýshylardyń týystary men áriptesteri keldi. Olar jýrnalısermen sóılesýge qarsy bolmady jáne BAQ ókilderiniń sot zalyna kirgizilgenin qalady.

- Olar kitap oqyǵan, biraq endi ol kitaptar "tyıym salynǵan" dep otyr. Negizinde, aıyptyń barlyǵy kitapqa qana súıenip taǵylyp otyr. Biraq Qazaqstanda bul kitaptarǵa tyıym salynbaǵan. Ol kitaptar álemdi taný, jalpy qalaı ómir súretinimiz týraly, barlyq adady súıý týraly bolǵan. Olar dinı emes, ǵylymı-tanymdyq kitaptar. Oǵan dálel bar. Ol kitaptar kóbine ezoterıka salasyna qatysty jáne medısınalyq kitap dep ataýǵa da bolady. Onda adam qany, onyń túrli oılar áserinen qalaı ózgeretini jaıly jazylǵan, - dedi Mıhaıl Tkachevtiń áıeli Vera Tkacheva.

Sottalýshylardyń týystary ózderine Tkachev pen Álıasqarovtyń zańǵa qaıshy naqty ne istegenin túsindirmegenin aıtady.

Sottalýshylardyń advokaty olardy proseske daıyndalýy úshin qamaýdan úıqamaqqa shyǵarýdy surady. Prokýror ol ótinishtiń "jónsiz" ekenin aıtady. Eki sottalýshynyń da advokattary buǵan deıin sýdıa men prokýrorǵa senbeıtinin aıtyp, qarsylyq bildirgen. Prokýror muny "prosesti ádeıi sozý" áreketi dep atady.