Senator, Qazaqstan prezıdenti Nursultan Nazarbaevtiń úlken qyzy Darıǵa Nazarbaeva birinshi dárejeli "El qorǵany" medalimen marapattaldy, dep jazady Qamshy.kz aqparat agenttigi.
Nazarbaevany qorǵanys mınıstri Sáken Jasuzaqov Astanada jastardy áskerı-patrıottyq tárbıe berý máseleleri jónindegi vedomstvoaralyq jıynda marapattady.
Qorǵanys mınıstri Nazarbaevaǵa "eldiń qorǵanys qabiletin kúsheıtýdi qoldap, úles qosqany úshin jáne jastarǵa áskerı-patrıottyq tárbıe berý qyzmetindegi belsendiligi" úshin alǵys bildirdi.
Darıǵa Nazarbaeva marapattyń ózine úmit uıalatatynyn, Qazaqstan úshin áskerı-patrıottyq qozǵalystyń mańyzdy ekenin aıtty.
Qorǵanys mınıstrligi erekshe kózge túsken áskerı qyzmetkerlerin bıylǵy naýryzdan bastap "El qorǵany" medalimen marapattaı bastaǵan edi.
Eske salsaq, Qorǵanys mınıstrliginde Qazaqstan Respýblıkasy Parlamenti Senatynyń kóshpeli otyrysy ótken bolatyn.
2017 jylǵy 15 qarashada Qazaqstan Respýblıkasynyń Qorǵanys mınıstrliginde Darıǵa Nazarbaevanyń tóraǵalyq etýimen Parlament Senatynyń halyqaralyq qatynastar, qorǵanys jáne qaýipsizdik jónindegi komıtetiniń kóshpeli otyrysy ótti.
Kóshpeli otyrys sheńberinde Áskerı doktrınanyń, Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń qurylysy men damýy tujyrymdamalarynyń máseleleri men onyń iske asyrylý jospary talqylandy.
İs-sharaǵa Senat depýtattary, QR Qorǵanys mınıstrliginiń, QR UQK Shekara qyzmetiniń, QR İİM Ulttyq ulanynyń basshylyǵy qatysty.
Otyrysty asha otyryp, D. Nazarbaeva elimizdiń qorǵanys qabilettiligi men qaýipsizdigin qamtamasyz etýge qatysty máselelerdiń mańyzdylyǵyn atap ótti. «Qarýly Kúshteri halqymyzdyń táýelsizdiginiń kepili bolyp tabylady», - syrtqy qaýip-qaterlerdi aldyn alý men joıýda armıanyń ulǵaıyp kele jatqan rólin atap ótip, senator hanym osylaı dedi.
Otyrysta QR QK Bas shtaby bastyǵynyń birinshi orynbasary general-maıor Rýslan Shpekbaevtyń Áskerı doktrına týraly sóz sóıleýi tyńdaldy. Ol Doktrınada kúresýdiń «býdandastyq» ádisteri, «áskerı emes quraldar», «syrtqy qarýly qaqtyǵys» sıaqty túsiniktemeler men uǵymdar alǵash ret qoldanylyp otyrǵanyn, QR QK, basqa da áskerleri men áskerı quralymdaryn qoldaný, kıberqaýipsizdikti, áskerı qaýipsizdiktiń ortaq júıesine aýmaqtyq qorǵanystyń kiriktirilýi, materıaldyq-tehnıkalyq qamtamasyz etý júıesiniń damýy, bitimgershilik qyzmetke Qazaqstannyń qatysýynyń keńeıtilýi, memlekettiń áskerı uıymyn basqarý júıesiniń damý tártibi naqtylanǵanyn atap ótti.
«Birlesken keshendi jumysymyz bolashaqta áskerimizdi qajetti zamanaýı qarý-jaraqpen jáne áskerı tehnıkamen jabdyqtaý boıynsha máselelerdi sheshýge múmknidik beredi. Ol úshin qorǵanys týraly Zańǵa tıisti túzetýler engizip, ony múddeli memleketttik organdarmen pysyqtaý qajet bolady», - dep atap ótti Parlament Senatynyń halyqaralyq qatynastar, qorǵanys jáne qaýipsizdik jónindegi komıtetiniń tóraıymy D. Nazarbaeva.
