Qazaqstan Prezıdenti Densaýlyq saqtaý mınıstri Eljan Birtanovty qabyldady, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Kezdesý barysynda Memleket basshysyna densaýlyq saqtaý salasyn damytýǵa arnalǵan «Densaýlyq» memlekettik baǵdarlamasynyń iske asyrylýy jóninde aralyq esep jáne mınıstrliktiń aldyna qoıylǵan mindetterdiń oryndalýy týraly aqparat usynyldy.

Elbasy aýrý-syrqaýdyń aldyn alý sharalarynyń mańyzdylyǵyn atap ótip, salaýatty ult qalyptastyrý isinde halyqtyń erekshe ról atqaratynyn aıtty.

– Azamattarymyzdy ózderiniń densaýlyqtaryn nyǵaıtýǵa tartýymyz qajet. Adam densaýlyǵynyń 10-15 paıyzy ǵana medısınaǵa táýeldi. Qalǵanynyń bári tek ózine baılanysty bolady, – dedi Nursultan Nazarbaev.

Qazaqstan Prezıdenti halyq arasynda salaýatty ómir saltyn nasıhattaý máselesine toqtalyp, qazaqstandyqtardyń ómir súrýiniń ortasha uzaqtyǵyn 80 jasqa deıin kóterý jónindegi mindettiń ózektiligine nazar aýdardy.

Densaýlyq saqtaý mınıstri Qazaqstan Prezıdentine turǵyndar densaýlyǵynyń negizgi kórsetkishteriniń jaqsaryp kele jatqanyn málimdedi.

– Barlyq kórsetkish boıynsha ahýal turaqty. Ómir súrýdiń ortasha uzaqtyǵy kóterilýde. Ana óliminiń kórsetkishi tómendep keledi. Bala óliminiń kórsetkishi de qatarynan birneshe jyl boıy tómendeýde, – dedi Eljan Birtanov.

Densaýlyq saqtaý mınıstri halyqtyń densaýlyǵyn jaqsartý boıynsha mınıstrliktiń qabyldap jatqan sharalary jóninde aıtyp, aýrý-syrqaý belgilerin bastapqy satyda anyqtaýdyń mańyzdy ekenin atap ótti.

– Qazaqstanda 2012 jyldan bastap tegin dári-dármekpen qamtý jónindegi baǵdarlama júzege asyrylýda. Onyń tıimdiligi óte joǵary. Baǵdarlama aıasynda 2,5 mıllıonǵa jýyq adam aýrýdyń 50 túri boıynsha, sonyń ishinde kúretamyr gıpertonıasy, qant dıabeti jáne onkologıalyq aýrýlar boıynsha tegin dári-dármekke qol jetkizip otyr, – dedi E.Birtanov.

Sondaı-aq, Eljan Birtanov Nursultan Nazarbaevqa kórsetiletin alǵashqy medısınalyq qyzmetterdiń sapasyn arttyrý jáne densaýlyq saqtaý júıesine sıfrlyq tehnologıalardy engizý jóninde qabyldanyp jatqan sharalardyń nátıjeleri týraly baıandady.

Kezdesý barysynda Memleket basshysy dári-dármek baǵasyn memlekettik retteý jáne farmasevtıka salasyndaǵy sybaılas jemqorlyqpen kúres júrgizý máselelerine erekshe toqtaldy.

– Meniń baǵaǵa qatysty máseleni sheshý jóninde bergen tapsyrmamnan keıin Farmasıa komıtetiniń tóraǵasy, «SK-Farmasıa» kompanıasynyń basshylyǵy jáne bes oblystyń basqarma basshylary ustaldy. Dári-dármek baǵasynyń negizsiz ósýi sharttar jasasýdaǵy zańnan tys áreketter nátıjesinde oryn alady, – dedi Elbasy.

Qazaqstan Prezıdenti alǵa qoıylǵan mindetterdiń ýaqtyly iske asyrylýyn qamtamasyz etýdi jáne densaýlyq saqtaý salasyna, sonyń ishinde dári-dármekterdi satyp alý úrdisine tıisti baqylaý ornatýdy tapsyrdy.

Bul rette, Nursultan Nazarbaev E.Birtanovqa ózi basshylyq etetin salaǵa derbes jaýap beretinin eskertti.