Dál qazir Astanada «Nur Otan Talks: modernization» konferensıasy ótip jatyr dep habarlaıdy Qamshy.kz aqparat agenttigi.
«Nur Otan» partıasynyń uıymdastyrýymen qolǵa alynǵan is-shara TED Talks formatynda ótýde. Oǵan negizinen Feısbýk jelisiniń qoldanýshylary qatysyp jatyr.
Konferensıanyń moderatory, «Nur Otan» partıasy Tóraǵasy Birinshi orynbasarynyń keńesshisi Janna Qurmanǵalıeva partıa músheleriniń, sarapshylardyń, qoǵam qaıratkerleriniń, mass-medıa ókilderiniń jáne el erteńine beıjaı qaramaıtyn barsha qazaqstandyqtardyń qatysýymen partıany jańǵyrtýdyń ózekti máseleleri talqylanatyn zamanaýı formattaǵy suhbattasý alańyn qurýdyń mańyzy joǵary ekenin aıtyp, is-sharany ashyp berdi.
Óz kezeginde belgili saıasattanýshy, áleýmettik jeliniń belsendisi Saıasat Nurbek partıanyń osyndaı beıresmı ári óte tıimdi formatta alǵash ret jıyn ótkizip otyrǵanyna aıryqsha nazar aýdaryp:
– Qaı kezde de kedergiler men qarsy pikir bildirýshiler kezdesedi. Iaǵnı, jańǵyrýdy qoldaıtyn da, oǵan qarsy shyǵatyn da azamattar bolady. Osy rette men tıimdi kelissózder ótkizip, eki aýdıtorıany ortaq múddege toǵystyra bilýimiz kerek dep sanaımyn, – dedi.
Spıkerler taqyryp aıasynda erkin pikir almasyp, óz oılaryn ashyq bildirýde. Olardyń arasynda Saıasat Nurbekpen qatar, Dınara Sátjan, Aıdos Sarym, Rahym Oshaqbaev, Táńirbergen Berdońǵar, Nurtas Adambaı sıaqty belsendiler de bar.
Aıta keteıik, partıa Saıası keńesiniń keńeıtilgen otyrysynda Elbasy Nursultan Nazarbaev partıany jańǵyrtý jáne onyń saıası jumysyna jańa úlgiler men ádisterdi qoldaný kerektigi týraly tapsyrma bergen bolatyn. Soǵan oraı konferensıaǵa qatysýshylar Qazaqstannyń úshinshi jańǵyrýy jáne Partıa Saıası keńesiniń keńeıtilgen otyrysynda Elbasy tapsyrǵan partıalyq jańǵyrý máselelerin talqylaýda.
