Keńes Odaǵy temir jol salýda respýblıkalar arasyndaǵy shekarany esepke almady. Odaqta oǵan qajettilik te bolǵan emes. Óıtkeni kólik aǵymyn shıkizat óndiretin óńirlerden ónerkásiptik ortalyqtarǵa eń qysqa jolmen baǵyttaý boldy. Alaıda, bul táýelsizdik alǵan soń kólik baılanysyn qıyndatyp jiberdi, — dep jazady Qamshy.kz aqparat agenttigi.
Shyǵys Qazaqstandy basqa óńirlermen jalǵaıtyn temir jol jelisi Reseıdiń Lokot jáne Tretákovo stansıalary arqyly ótti. El arasyndaǵy kedendik kedergiler júk jáne jolaýshy tasymalyna eleýli áser etti.
Qazaqstan Prezıdenti uzaq merzimdi «Qazaqstan - 2030» strategıasynda «Tarıhı turǵydan alǵanda, elimizdiń aýmaǵy arqyly Shyǵystan Batysqa jáne keri qaraı kólik legi toqtaýsyz ótip jatty, al olardyń jyljý jıiligi búgingi kúni de saıabyrsıtyn emes. Qazaqstannyń mindeti otandyq kólik-kommýnıkasıa kesheniniń básekelestik qabiletin jáne aýmaǵymyz arqyly ótetin saýda leginiń ulǵaıtylýyn qamtamasyz etýde jatyr» dep keltirdi. Bul mindet temir joldyń Shyǵys Qazaqstandaǵy bóligin qaıta jasaýdy talap etti.
«Óskemen-SHar» temir jolynyń salynýy barlyq óskemendikter tarapynan qolaý tappady. Óıtkeni temir joldyń jańa jelisi tez ulǵaıyp kele jatqan JMK aýdanyn kesip ótetin boldy. Degenmen, qalalyqtardyń kúdigine qaramastan 2005 jyly qurylysty bastaý jónindegi sheshim shyqty.
Bul qurylys Qazaqstannyń jańa tarıhyndaǵy alǵashqy memlekettik-jekemenshik seriktestik jobasy boldy. «Dosjan temirjoly» konsessıoneri atalmysh qurylysqa ártúrli kózderden ınvestısıa tartty. Konsesıalyq kelisim merzimi 2009 jyldan, ıaǵnı «Óskemen-SHar» temirjol jelisi qoldanysqa berilgennen bastap, 2028 jylǵa deıingi aralyqty qamtıdy. Budan keıin temirjol tolyqtaı memleket menshigine ótedi.
Shyǵysqazaqstandyq memlekettik-jekemenshik áriptestik tájirıbesi 2006 jylǵy 7 shildede Prezıdenttiń qolymen bekitilgen jańa konsesıalar týraly Zańynyń negizine aınaldy.
Qala tirshiligine tıtimdeı ǵana keri áser etken jańa jol Almatyǵa deıingi joldy qomaqty túrde qysqartty. 149,6 shaqyrymdyq joldyń ashylýy jańa stansıalardyń paıda bolyp, jańa jumys oryndarynyń ashylýyna jáne qyzmet kórsetýshi jumysshylarǵa jańa baspanalar salýǵa sep boldy. Shyǵys óńiri bul jobadan tek tabysqa keneldi.
Irına Plotnıkova
