Qazaqstan ekonomıkasynyń negizi áli de shıkizat eksportyna baǵyttalǵan. Ekonomıkanyń bul qurylymy Qazaqstan Reseı ımperıasynyń bodany bolǵan jyldary qalyptasty. Keńes dáýirinde júrgizilgen ındýstrıalandyrý kezinde respýblıkanyń alǵa qoıǵan basty baǵyty – shıkizat óndirý salasy boldy, — dep jazady Qamshy.kz aqparat agenttigi.
Jas táýelsiz memlekettiń egemendigi úshin mundaı jaǵdaı óte qaýipti. Sebebi álemdik daǵdarys oryn alǵanda birinshi kezekte shıkizat eksporttaýshylar zardap shekpek. Óıtkeni sol ýaqytta shıkizattyń quny joǵary tehnologıalyq ónimderge qaraǵanda áldeqaıda arzanyraq bolady.
Memleket basshysy Nursultan Nazarbaev «Qazaqstan-2030» Strategıasynda ekonomıkanyń shıkizattyq emes sektorynda eksportqa baǵyttalǵan joǵary tehnologıalyq óndiristerdi qurý týraly tapsyrma berdi.
2007 jyldyń 27 qyrkúıeginde Semeı qalasynda «SemAZ» JSHS óndiristik ýchaskelerinde Daewoo avtobýstaryn shyǵaratyn zaýyttyń ashylý saltanaty ótti.
Bul óndiris Qazaqstandaǵy tolyq sıkldi avtokólik qurastyratyn alǵashqy kásiporyn boldy, osynyń arqasynda elimiz ımporttyq kólik qondyrǵylarynyń jıyntyǵyn jınap qana qoımaı, sondaı-aq qurastyrý, dánekerleý jáne shanaqty boıaý múmkindigine ıe boldy.
Buryndary joǵary tehnologıalyq óndiristeri bolmaǵan Semeı qalasy úshin bul taptyrmas jańashyldyqtyń bolǵany aıtpasa da túsinikti. Respýblıkaǵa 2,5 mln. AQSH dollary kóleminde sheteldik ınvestısıalar kelip tústi. Osynyń nátıjesinde qalada jańa jumys oryndary quryldy.
2009 jylǵy 18 maýsymda Qazaqstan Respýblıkasynyń Prezıdenti Nursultan Nazarbaev «Daewoo Bus Kazakhstan» avtobýs zaýytynda bolyp, memlekettiń mashına jasaý keshenine qoldaý kórsetetindigin aıtty.
On jyldan astam ýaqyt boıy jumys istegen zaýyt jańa ónimderdi shyǵarýyn ary qaraı da jalǵastyrýda. Bul jerde birneshe júk mashınalary men traktorlar shyǵarylyp, reseılik shaǵyn avtobýstardyń qurastyrylýy jónge qoıylǵan. Búgingi tańda avtokólik qurastyrý zaýytynda 450 adam jumys isteıdi. 2017 jyly Semeı qalasyndaǵy avtokólik qurastyrý kompanıasy «Altyn sapa» syılyǵyna úmitkerlerdiń tizimine enip otyr.
Irına Plotnıkova
