Aqmola oblysynyń ákimi Málik Myrzalın Pekındegi iskerlik kezdesýleri jaıynda óziniń Facbook jelisindegi paraqshasynda jazdy, dep habarlaıdy Qamshy.kz aqparat agenttigi.
«Búgin Pekınde ınvestısıalyq jáne óndiris qurylymdarymen 9 iskerlik kezdesý ótkizdim.
Qytaıdyń "CITIC" eń iri memlekettik ınvestısıalyq korporasıasynyń prezıdenti Wang Jiong myrzamen kezdestim (naryqtyq kapıtaly 50 mlrd. dollar). Týrızm, aýylsharýashylyǵy, qurylys, turǵyn-úı ınfraqurylymy, mashınaqurastyrý, bıdaıdy tereń óńdeý boıynsha ózara yntymaqtastyqty damytý týraly ýaǵdalastyq.
Jylýmen qamtýdaǵy ınovasıany álemdegi eń joǵary tehnologıany qoldanyp, elektr energıasyn qaldyqsyz óndirýde kóshbasshy sanalatyn "Shenwu" kompanıasynyń basshylyǵymen talqyladym», - dedi Málik Myrzalın.
Sondaı-aq ákimniń aıtýynsha, qazaqstandyq astyqtyń 25%-yn óndiretin Aqmola oblysy qytaılyq kompanıalardyń qyzyǵýshylyǵyn týdyryp otyrǵanyn jazdy.
«Qazaqstandyq astyqtyń 25 paıyzyn óndiretin Aqmola oblysy, Qytaıdyń aýylshýaryshylyǵy tehnıkasyn shyǵaratyn jetekshi kompanıalaryn qyzyqtyrdy. Bul jerde bizdi birlesken kompanıa ashý máselesi qyzytyrdy.
Osy turǵyda "Longyuan Shiying Machinery Production Co. Ltd", "YTO Group", "Huanghai Jinma Tractor", "Longtai Shandong" kompanıalary basshylarymen sóılestik.
Qytaıdyń sheteldik ekonomıkalyq qarym-qatynas ulttyq kompanıasy basshylyǵymen de kezdestim. Fortune 500 quramyna kiretin kompanıa, oblys ortalyǵynda sý tazartý stansasy men qoljetimdi baspana qurylysy jobalaryna qyzyǵýshylyq tanytty.
Endi ózara kelisimniń kelesi qadamy bolyp, qytaılyq jumys tobynyń Aqmola oblysyna sapary bolady. Sapary barysynda taraptarmen aýylsharýashylyǵy, mashınaqurylysy, energetıka, týrızm jáne ekonomıkanyń basqa da sektory boıynsha birlesken kompanıa qurý týraly máseleler egjeı-tegjeıli qaralady.
Erteń Qytaıdyń 71 mln-nan astam turǵyny bar Hebeı provınsıasyna baramyz, bul provınsıa Aqmola oblysy sıaqty astanalyq aımaq sanalady, Qytaıdyń eń iri astyqty óńiri», - dep jazdy Myrzalın.
Qarashanyń basynda Aqmola oblysynyń ákimi halyqpen jaqyn bolý maqsatynda Facebook jelisinde jeke paraqshasyn ashqany habarlanǵan.
