Qyrǵyzstan 100 mıllıon dollar tehnıkalyq kómek bólý týraly Qazaqstanmen jasalǵan kelisimniń kúshin joıǵanyn resmı túrde habarlady, dep jazady Qamshy.kz aqparat agenttigi sputniknews.kz málimetine súıenip.
Bul týraly QR syrtqy ister mınıstrligi baspasóz qyzmetiniń jetekshisi Ánýar Jaınaqov málimdedi.
"Biz qyrǵyz tarapynan ótken aptada kelisimniń kúshi joıylǵany týraly resmı habar aldyq. Odan ári bul másele halyqaralyq quqyq normalaryna saı sheshiletin bolady", — dedi Jaınaqov jýrnalıserge.
Qazaqstan osy jyldyń shildesinde Qyrǵyzstanǵa 100 mıllıon dollar bólý týraly kelisimdi ratıfıkasıalady. Qarajat Qyrǵyzstannyń Eýrazıalyq ekonomıkalyq odaqqa qosylýy boıynsha is-sharalardy júzege asyrýǵa, atap aıtsaq, qyrǵyz ýchaskesindegi keden ınfraqurylymyn jaqsartýǵa, Qyrǵyzstannyń sanıtarlyq, veterınarlyq jáne fıtosanıtarlyq júıelerin odaqtyń talaptaryna sáıkestendirýge bólingen bolatyn.
Kelisimniń buzylýyna Qyrǵyzstanda ótken prezıdent saılaýy kezinde Astana men Bishkek arasynda týyndaǵan dıplomatıalyq janjal sebep boldy. Saılaý kezinde Qyrǵyzstannyń burynǵy prezıdenti Almazbek Atambaev Qazaqstan bıligin synaǵan edi.
