Qazaqstan Respýblıkasynyń Prezıdenti Nursultan Nazarbaevtyń halyqqa arnaǵan «Qazaqstannyń úshinshi jańǵyrýy: Jahandyq básekege qabilettilik» atty Joldaýynda aıtylǵan derekter men dáıekter kún sanap máni men mańyzy jaǵynan balamasyz dúnıege aınalyp keledi.
Mańǵystaý oblysynda týrıserge jaǵdaı jasap, týrızmdi damytý maqsatynda qolǵa alynǵan jobalardyń biri «Ata joly» avtojolyn jańartý jumystary. Bul Elbasy Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» joldaýynda aıtylǵan «óńirlerdiń damýy-eldiń damýy» tapsyrmasyna sáıkes iske asyrylyp jatqan joba, dep habarlaıdy Qamshy.kz Mańǵystaý oblysy ákiminiń baspasóz qyzmetine silteme jasap.
Uzyndyǵy 97 shaqyrymdy quraıtyn jol 2011 jyly paıdalanýǵa berilgen. Alaıda, birneshe qabattan turatyn avtojoldyń sońǵy qabaty, ıaǵnı asfálttaý jumystary bıyl qolǵa alynyp, oǵan 5 mld. teńge bólinip otyr. Jobanyń rekonstrýksıalaý jumystary bastalyp, Mańǵystaý oblysy Qaraqıa aýdanynyń aýmaǵynda asfált tóseldi.
Sharanyń ashylý saltanatynda sóz alǵan oblys ákimi Eraly Toǵjanov: «Memleket basshysy Nursultan Nazarbaev ózi atap ótkendeı otandyq týrızmdi damytý úshin aldymen logıstıka men ınfraqurylymdy jandandyrýymyz qajet. Búgingi «Ata joly» avtojolyn jańartýdaǵy negizgi maqsatymyz osy. Iaǵnı, sapaly jol salynsa, el-jurt keledi, tirshilik bastalady. Basqa da qyzmet kórsetý ortalyqtary boı kóterip, kóptegen kásipkerdiń tabys tabýyna jol ashylary anyq. Bul jol jaqsylyqqa bastaıtyn jol bolmaq» dedi. Sondaı-aq ol bul jańartý jumystary Úkimettiń qoldaýy arqyly Mańǵystaý oblysy ákimdigi men QR Investısıalar jáne damý mınıstrligi birlesip atqaryp jatqan kóp isterdiń biri ǵana ekenin atap ótti.
