Almatyda kólikti reformalaý jáne turaqty kólik júıesin qalyptastyrý barysynda jyljymaly sostavty jańartý isi jalǵasýda. «Lıaz» markaly tómen edendi kondısıonerlermen jáne vıdeokameralarmen jabdyqtalǵan 16 avtobýs №86 baǵyty boıynsha qyzmet kórsetýdi bastady.

«Barlyq avtobýstar tómen edendi, múmkindigi shekteýli jandar úshin oryndar bar. Barlyq jyljymaly sostav «Evro 5» ekologıalyq synybyna jatady. Iýıyl biz barlyǵy 388 avtobýs satyp aldyq, olardyń 100-i shaǵyn syıymdylyqty jáne taýly jerlerge arnalǵan, qalǵandarynyń syıymdylyǵy úlken jáne ortasha. Olar qalaǵa jetisimen baǵyttar boıynsha júretin bolady», -dep atap ótti «Almatyelektrotrans» JSHS-niń dırektory Rızvan Sınaev.

Tasymaldaýshylar №86 baǵytynyń qalada barynsha tanymal ekendigin, Orbıta-1 yqsham aýdanynan bastap azamattyq avıasıa Akademıasyna deıin baratynyn, qalanyń ortalyǵyn, Ál- Farabı dańǵylyn, Fýrmanov kóshesin, Raıymbek jáne Súıinbaı dańǵyldary men basqalaryn qamtıtynyn aıtty.

«Buryn avtobýstardyń jetispeýshiliginen kólik sırek júretin, sóıtip turǵyndardan jıi shaǵym túsetin. Bizge deıin bul baǵytqa jeke tasymaldaýshy qyzmet kórsetken edi. Endi atalǵan baǵyt tolyq jabdyqtalyp, avtobýstar keste boıynsha júretin bolady», - dedi R.Sınaev.

Aıta keterligi, «Almaty-2020» qalalyq damý baǵdarlamasynyń basty qaǵıdalarynyń biri qoǵamdyq kólikti reformalaý,sonyń barysynda jyljymaly sostav jańarýda. Eske salsaq, buǵan deıin №65, 50, 103, 126, 112 baǵyttary jańarǵan edi. Bularmen qosa №77 baǵyt ta óziniń jumysyn jańǵyrtty. Jyljymaly sostavty jańartý isi basqa baǵyttarda da jalǵasaatyn bolady. Jyl aıaǵyna deıin Almaty qalasynyń ákimdigi megapolıstiń avtobýs parkiniń 30%-yn jańartýdy josparlap otyr.