Medısınalyq qyzmetterge tapsyrystardy ornalastyrý bıyl alǵash ret mindetti áleýmettik medısınalyq saqtandyrý júıesi sheńberinde ótkizilip jatyr dep habarlaıdy Qamshy.kz aqparat agenttigi. Medısınalyq kómektiń qoljetimdilik qaǵıdasyn qamtamasyz etý jáne densaýlyq saqtaý mekemeleri arasynda básekelestikti damytý úshin, menshik túrleri táýeldiliginen tys, biryńǵaı qyzmet kórsetýshiler bazasy qalyptastyryldy.
Elimizde memlekettik tapsyrysty ornalastyrýǵa 1600 astam densaýlyq saqtaý nysany ótinim bildirdi. Onyń 45 paıyzdan astamy – jeke menshik klınıkalar.
- MÁMS jáne Tegin medısınalyq kómektiń kepildendirilgen kólemi sheńberinde memlekettik klınıkalarǵa da, jeke menshik aýrýhanalar men emhanalarǵa da teńdeı jaǵdaıdyń jasalýy óz nátıjesin ákelip jatyr. Astana qalasynda memlekettik tapsyrysty ornalastyrý boıynsha 73 densaýlyq saqtaý sýbektisi qujattaryn tapsyrdy. Olardyń 36- memlekettik, 37 – jeke menshik medısınalyq uıymdar men ortalyqtar. Bul 2017 jylǵy kórsetkishten eki ese kóp, - deıdi Astana qalasy boıynsha «ÁMSQ» KEAQ fılıalynyń dırektory N.Qabdyqaparov.
Bul derekterge súıene otyryp, jeke menshik klınıkalar Qordyń bastamasyn qoldap, medısınalyq qyzmetterdi ornalastyrýǵa qujat ótkizý jumystaryna belsendi túrde qatysyp jatyr deýge bolady. Sondaı-aq, bıyl tuńǵysh ret proseske iri-iri jeke menshik kompanıalar qatysyp otyr.
Tegin medısınalyq kómektiń kepildendirilgen kólemine bólingen búdjettik qarajat stasıonarlar, emhanalar, jáne de qyzmettiń jekelegen túrlerin kórsetetin qosymsha atqarýshylar arasynda bólinetin bolady.
«Áleýmettik medısınalyq saqtandyrý qory» KEAQ basqarýshy dırektory Erik Baıjúnisovtiń aıtýy boıynsha, MSQ barlyq túsken ótinishterdi jeltoqsan aıynyń ortasyna deıin saraptaıdy. Medısına uıymdaryn birneshe kórsetkish boıynsha baǵalaý josparlanyp otyr. Olardyń arasynda kadrlar quramy men materıaldyq-tehnıkalyq jabdyqtalý deńgeıi, sońǵy 3 jylda atqarǵan qyzmetine qatysty negizgi kórsetkishter, rastalǵan, negizi bar shaǵymdar t.b. kórsetkishter bar.
- Saraptama nátıjesinde qandaı medısına uıymdarynyń tıisti deńgeıde qyzmet kórsete alatynyn, qaısylarynyń oǵan shamasy jetpeıtinin anyqtaýǵa bolady. İrikteýden ótpegen sýbektilerimen MSQ kelisimshart bekitpeıdi, - deıdi «Áleýmettik medısınalyq saqtandyrý qory» KEAQ basqarýshy dırektory Erik Baıjúnisov.
Densaýlyq saqtaý júıesi reformasynyń aıasyndaǵy Qordyń basty maqsaty – turǵyndardy qoljetimdi jáne sapaly medısınalyq kómekpen qamatamasyz etý. Sondyqtan respýblıkalyq jáne aımaqtyq komısıalar árbir ótinishti muqıat qarastyrady. Komısıalardyń quramyna memlekettik emes uıymdar, bedeldi ekspertter jáne basqa da ýákiletti tulǵalar kirdi.
