Almaty ákimi Gonkongqa jumys sapary barysynda óńirdiń memlekettik jáne isker ortasymen birqatar ekijaqty kezdesýler ótkizdi, sonymen qatar Gonkong ákimshiliginiń basshysy Kerrı Lammen júzdesti. Taraptar ınvestısıalyq jáne týrısik salalar boıynsha yntymaqtastyqty nyǵaıtý máselelerin talqylady, qalaqurylysy salasy men smart- tehnologıany engizý boıynsha tájirıbe almasty.
Kezdesý barysynda Kerrı Lam Almaty ekonomıkasy Gonkongtaǵydaı túrli servısten,saýdadan, qarjy qyzmeti men logıstıkadan quralatyndyǵyn, sonyń arqasynda turaqtylyq qamtamasyz etilip, qala ınvestısıa tartý úshin tartymdy bolatyndyǵyn atap ótti.
«Almaty – óńirdiń qarjy jáne mádenı ortalyǵy ári bizdiń elimizdiń mańyzdy seriktesi bolyp tabylady. Sizderdiń Prezıdentterińiz N.Á.Nazarbaevtyń ıntegrasıalyq saıasaty arqasynda aımaqta Eýrazıalyq ekonomıkalyq odaq qurylyp, onyń naryǵyna 180 mln. adam engen, bul ınvestorlarǵa zor múmkindikter beredi. Men Almatyny ınvestısıa salýǵa ábden laıyq qala dep sanaımyn. Kezinde bizdiń basty ınvestısıalyq saıasatymyz Gonkongke ınvestısıa tartý bolatyn, al qazir biz ınvestısıany basqa elderge salatyn óz kompanıalarymyz ben kásiporyndarymyzdy yntalandyryp kelemiz. Biz jańa naryqty izdeýdemiz jáne ınvestısıa salý úshin esigimizdi aıqara ashamyz. Investısıadan ózge eki jaqqa da paıdaly týrısik aǵymdar bar. Ekonomıkalyq sýbekt bolǵandyqtan biz Qazaqstanmen, sonyń ishinde Almatymen mádenıet, bilim, saýda jáne ekonomıkalyq salalar boıynsha yntymaqtastyqty nyǵaıtýǵa yntalymyz. Men óz tarapymnan eki jaqty baılanystyń damýyna yqpal etemin», - dedi K.Lam.
Almaty ákimi Baýyrjan Baıbek qalada ınvestısıa men gonkongtik kompanıalardyń tájirıbesin qajet etetin birqatar iri ınfraqurylymdyq jobalardyń qolǵa alynǵanyn aıtty.
«Búgingi kúni Qazaqstanda álemniń damyǵan 30 eliniń qataryna ený úshin Memleket basshysynyń bastamasymen «Qazaqstan 2050» Strategıasy» baǵdarlamasy oıdaǵydaı júzege asýda. Bizdiń Prezıdentimiz «Sıfrly Qazaqstan» baǵdarlamasyn engizýdi aldymyzǵa mindet etip qoıdy. Qazirgi kezde Almatyda «Smart sıtı» jobasy iske asýda, onyń basty baǵyty qaýipsizdik, densaýlyq saqtaý, bilim, TÚKSH jáne kólik reformasy. Bizge Gonkongtyń osy salalarda smart-tehnologıany paıdalaný tájirıbesi mańyzdy. Bulardan ózge, Almaty ınvestısıa tartý boıynsha úlken jumystar júrgizýde. Eger «Doing Business» reıtıńinde Gonkong 4 orynda tursa, álemniń 190 eliniń ishinen Almaty 36-ynshy orynda. «Bir tereze» qaǵıdasy boıynsha biz Almatyǵa kelgen ınvestorlarǵa jobalaryn júzege asyrý úshin barlyq kómekti kórsetemiz. Ortalyq Azıanyń 65 mıllıondyq, Eýrazıalyq ekonomıkalyq odaqtyń 180 mıllıon adamy bar naryǵy qyzyqtyratyny sózsiz. Eger kásiporyn Almatyda ornalassa bular qojetimdi bolady. Mysaly, ótken jyly Prezıdentimiz telekópir arqyly Almatyda Japonıanyń «Tokyo Rope» zaýytyn ashty. Bir tapsyrystyń ózi ǵana zaýytty salýǵa jumsalatyn shyǵynnan bes ese artty. Qazir bul kompanıa óz ónimderin tek Orta Azıaǵa ǵana emes, sonymen qatar BAE, Reseıge jiberýde. Búgingi kúni kompanıa Almatyda úshinshi zaýytyn salýda. Biz gonkongtik ınvestorlarǵa da barlyq jaǵdaıdy jasaımyz», - dep atap ótti Baýyrjan Baıbek.
Almaty ákimi Baýyrjan Baıbek jumys sapary barysynda Gonkongitiń ınvestısıa jáne tehnologıa boıynsha hatshysy Nıkolas Iangpen, Qytaı óndirýshileriniń «The Chinese Manufacturers Association» asosıasıasymen kezdesti. Bulardan ózge Almaty delegasıasy ǵylymı jáne tehnologıalyq park jónindegi Gonkong korporasıasynyń jumysymen de tanysty. Taraptar startaptardy damytý jáne qoldaý, qalalardyń ekonomıkalyq áleýetin arttyrý men joǵary tehnologıa salalarynda jumys oryndaryn ashý máselelerin talqylady.
Almaty delegasıasy Gonkongtyń jsoparlaý jáne ınfraqurylym jónindegi kórme galereıasynda da boldy, munda megapolıster aldynda turǵan mindetter olardy sheshý joldary týraly aıtyldy.
«Búgingi kúni Gonkong turǵyndary óte tyǵyz ornalasqan, bir sharshy metr 6 myńǵa jýyq adamdy quraıdy. Qalanyń jańa aýdandaryn josparlaýda kólikpen qamtamasyz etý mańyzdy.Gonkongte 7,2 mln. adam turady, 730 myń avtomobıl bar, joldardyń uzyndyǵy 2100 km. Iaǵnı, bir kılometr jolda 350 mashına júredi. Sondyqtan Gonkong turǵyndarynyń 90%-y qoǵamdyq kólikti paıdalanady. Avtomobıl – qymbat, onyń ústine baǵasy saǵatyna 30-40 gonkongtik doollardy quraıtyn kólik turaǵyn tabý qıyn. Sońǵy jyldary qala ortalyǵynda kólik turaǵy azaıyp, ekologıany jaqsartý sharalary júzege asýda», - dep túsindirdi Gonkongti damytý jónindegi hatshynyń orynbasary Lú Chýn San.
Jumys saparynyń qorytyndysy boıynsha keler jyly Almatyda Gonkongtiń saýdasyn damytý jónindegi Keńes ókildigin ashý týraly kelisimge qoljetti. Bulardanı ózge, Gonkong pen Almatyda saýda, ınvestısıa, ınovasıa jáne SHOB boıynsha yntymaqtastyqty nǵyaıtý úshin «Almaty» áleýmettik kásipkerlik korporasıasy men Gonkongtiń saýdany damytý Keńesi arasynda qajetti memorandýmǵa qol qoıyldy.
