Qazaqstan Respýblıkasy Táýelsizdik merekesine, Qazaqstan Respýblıkasy Tuńǵysh Prezıdenti kúnine oraı «S. Muqanov pen Ǵ. Músirepovtiń ádebı-memorıaldyq mýzeı kesheninde»  «Kók týdyń jelbiregeni» atty ádebı kesh ótti , dep habarlaıdy Qamshy.kz aqparat agenttigi.

S. Muqanov pen Ǵ. Músirepovtiń ádebı-memorıaldyq mýzeı kesheniniń jetekshisi, Halyqaralyq «Alash» ádebı syılyǵynyń laýreaty, fılologıa ǵylymdarynyń kandıdaty, aqyn Ádilǵazy Qaıyrbekovtyń júrgizýimen ótken ádebı keshte QR Mádenıet qaıratkeri, Shyǵys Qazaqstan oblysy Tarbaǵataı aýdanynyń qurmetti azamaty, Qazaq poezıasyna ózindik qoltańbasymen kórinip júrgen belgili aqyn, «Kók týdyń jelbiregeni» kitabynyń avtory Almasbek Ahmetbekuly qonaq boldy.

Keshke jınalǵan qaýym Almasbek Ahmetbekulyna otbasy men shyǵarmashylyq joly turǵysynan suraqtar qoısa, biz de óz kezegimizde "Rýhanı jańǵyrý" jaıynda  A.Ahmetbekulynyń pikirin suraǵan edik.  

Qurmetti Almasbek Ahmetbekuly, búgingi tańda eki jınalystyń birin "Rýhanı jańǵyrý" aıasynda dep júrgender kóp. "Rýhanı jańǵyrýdy" qalaı túsinesiz ?

"Men bitken oıpań jerge alasa aǵash,

Emespin jemisi kóp tamasha aǵash.

Qalǵansha jarty jańqam men seniki 

Paıdalan sharýańa jarasa, alash!" dep ótken, osydan tup-týra 100 jyl buryn Alashordany qurǵan  Alashordashylardyń rýhanı jalǵasy bolatyn 10 tulǵanyń bolýy -  "Rýhanı jańǵyrý".

Elbasymyzdyń kóregen saıasatynyń arqasynda atalǵan joba búginde qolǵa alynyp jatyr, birshama jumystar atqarylýda. Búgin bizdiń jınalyp, ádebı keshke jastardyń jınalýy da "Rýhanı jańǵyrý" aıasynda atqarylyp jatqan istiń biri". 

"Meniń aldymda óz janym men kók týdyń birin tańdaý kerek bolsa, men mindetti túrde kók týdy tańdaımyn. "Kók týdyń jelbiregeni" óleńi elime degen mahabbattan týǵan óleń" , dep aıtyp ótti A. Ahmetbekuly. 

Ádebı keshke jınalǵan qaýym qasıetti qara óleń men kıeli dombyradan tógilgen ásem ánmen sýsyndap, rýhanı azyq jınady. 

 Aıta ketsek, 2017 jyldyń 6 naýryzynda  «Kók týdyń jelbiregeni» atty jyr jınaqtyń ekinshi ret baspadan shyqqany habarlanǵan bolatyn.