Almatyda jastarǵa arnalǵan 2020 jylǵa deıin 12 jataqhana salynady, sonyń 4-eýiniń qurylysy bıyl aıaqtalady. Bul týraly Almaty qalasy boıynsha Qazaqstan halqy Assambleıasy hatshylyǵynyń meńgerýshisi Nazar Balǵymbaev «Dostyq úıinde» ótken «Birligi myqty jastar - bolashaqqa jol bastar» aksıasynda aıtty.
Búgin Almatydaǵy «Dostyq úıinde» ótken «Birligi myqty jastar - bolashaqqa jol bastar» aksıasynda baıandama jasaǵan Qazaqstan halqy Assambleıasy hatshylyǵynyń meńgerýshisi Nazar Balǵymbaev Almatyda «Jastar jyly» ishinde atqarylǵan naqty sharalarǵa toqtaldy.
«Qazaqstandaǵy árbir úshinshi stýdent Almatyda bilim alyp jatyr. Sondyqtan da Elbasynyń bastamasymen 2017 jyl Almatyda «Jastar jyly» bolyp jarıalanǵan bolatyn. Osyǵan oraı Almatyda jol kartasy ázirlenip, sapaly bilim, jumyspen qamtý, mádenıet, salaýatty ómir saltyn damytý, turǵyn úımen qamtamasyz etý sekildi negizgi 5 baǵyt boıynsha jumys atqaryldy. Jastardyń turǵyn úı máselesin sheshý úshin bıyl stýdentter men jas otbasylarǵa jataqhanalar salý jobasy qolǵa alyndy.
«Jol kartasy» aıasynda 2020 jylǵa deıin Almaty stýdentterine 12 jataqhana salý josparlanǵan. Josparlanǵan 12 jataqhananyń 4-eýiniń qurylysy bıyl aıaqtalady. «Almaty jastary» dep atalatyn baǵdarlamamen jastarǵa baspanany jeńildetilgen jolmen jalǵa berý jospary bastaldy. «Turǵynúıqurylysjınaq» banki arqyly nesıeleýdiń pılottyq jobasy iske qosyldy. Jastardyń jas deńgeıi 35-ke deıin uzartylyp, baǵdarlamanyń júzege asýy úshin jergilikti búdjetten 1 mlrd teńge bólindi. «Almaty jastary» baǵdarlamasy arqyly jyldyq 5 paıyzdyq mólsherlememen jyl aıaǵyna deıin 100 jas otbasy baspanaly bolady», - dedi baıandamashy Nazar Balǵymbaev.
Nazar Balǵymbaev 2017 jyly jastardy jumyspen qamtý kólemi de artqanyn jetkizdi.
«Jastardy jumyspen qamtýǵa jergilikti búdjetten 500 mln teńge bólindi. Jumys izdegen 2000 jas ınovasıalyq mamandyqtardy ıgerý úshin oqýǵa jiberildi. 2017 jyly barlyǵy 16 000 adam jumysqa ornalastyryldy. Jastarǵa arnalǵan Loft-ortalyq ashylyp, onyń bazasynda eriktiler, jas kásipkerler, jas sýretshiler sekildi ortalyqtar jumys isteı bastady. Sonymen qatar, qyrkúıek aıynda Alataý aýdanyndaǵy Atletter qalashyǵynda jastarmen jumys jasaıtyn «Almaty jastary» ortalyǵy jumysyn bastady. Áýezov aýdanynda dál sondaı «Baǵdarsham» ortalyǵy ashyldy», - dedi Nazar Balǵymbaev.
«Birligi myqty jastar - bolashaqqa jol bastar» sharasy aıasynda «Biz latyn álipbıin qolaımyz» aksıasy ótti. Onda 3*2 metrlik bannerge 100 jas ókil qol qoıyp shyqty. Sonymen qatar, «Q kezeńiniń jastary» flesh-moby ótti. Onda sýretter salynǵan fýtbolka kıgen 120 jas Panfılov kóshesi boıyndaǵy jańa jaıaý júrginshige arnalǵan jolmen júrip ótti.
