Búgin OKQ-de Qazaqstannyń ekologıalyq uıymdary qaýymdastyǵy tanystyryldy, dep habarlaıdy Qamshy.kz aqparat agenttigi Sputnik Qazaqstan málimetine súıenip. 

Qaýymdastyq prezıdıýmyna "Qoǵamdyq mańyzdy bastamalardy damytý qoryn" basqaratyn Álıa Nazarbaeva jetekshilik etedi. Qor ekologıa máselesimen de aınalysady. Qaýymdastyqtyń qamqorshylyq keńesine "jasyl ekonomıka" boıynsha Nobel syılyǵynyń laýreaty, jasyldaný konsepsıasynyń avtory Rae Kvon Chýng endi. 

Tanystyrylym barysynda qaýymdastyq prezıdıýmynyń múshesi Saltanat Rahımbekova Álıa Nazarbaevanyń quttyqtaý sózin oqyp berdi. 

"Qazaqstannyń ekologıalyq uıymdary qaýymdastyǵy júıeli ekologıalyq bastamalardy qurý jáne ilgeriletý, "jasyl" ekonomıkany nasıhattaý alańyna aınalyp, ulttyń ekologıalyq etıkasy men mádenıetiniń qalyptasýyna, ekologıalyq bilim men tárbıege erekshe mán beredi. Ózindik retteý qaǵıdattary negizinde ekologıa problemalary boıynsha memlekettik organdarmen etene baılanys ornatý óte mańyzdy. Bizdi qoǵamda ekologıalyq mádenıet qalyptastyrý boıynsha úlken jumys kútip tur. Biz birlesip qana aıtarlyqtaı mańyzdy nátıjelerge qol jetkize alamyz. Osy sátti paıdalanyp, qyzyǵýshylyq tanytqandardyń barlyǵyna esigimiz ashyq ekenin aıtqym keledi. Barlyq ekologıalyq uıymdy kúsh-jigerimizdi biriktirýge shaqyramyn", — delingen quttyqtaý hatta. 

Ekologıalyq uıymdar qaýymdastyǵy óz aldyna ekologıalyq bastamalar jáne olardy ilgeriletý alańyn qurý; halyqaralyq seriktestikti damytý, ınvestısıa tartý, halyqaralyq jobalar men baǵdarlamalarǵa qatysý, halyqaralyq sarapshylardy shaqyrý; "jasyl" tehnologıany engizý, qalalardaǵy ekologıalyq ınfraqurylymdardyń damýy men  ınovasıalardyń alǵa basýyna úles qosý; QR ekologıalyq máseleler boıynsha zańnamany jetildirý mindetterin qoıyp otyr.