Nazarbaev Ýnıversıtetinde osy taqyrypta zamanaýı master-klass ótti. Sharany «Jas Otan» Jastar qanaty men «Bolashaq» Asosıasıasy birlese otyryp uıymdastyrdy. Astana qalasyndaǵy joǵary oqý oryndarynyń stýdentteri men jas mamandar kóshbasshy bolýdyń qyr-syryn meńgerdi, dep jazady Qamshy.kz aqparat agenttigi.
Master-klass barysynda qatysýshylar kóshbasshy uǵymyn elimizdiń saıası tájirıbesinde oryn alǵan jaǵdaılardy mysalǵa ala otyryp qarastyrdy. Jastar Elbasy Nursultan Nazarbaevtyń el tarıhynyń ár túrli kezeńinde qabyldaǵan sheshimderine taldaý jasady. Elbasynyń qabyldaǵan sheshimderine baılanysty kóshbasshyǵa tán basty qasıetterdi anyqtady. Iadrolyq qarýdan bas tartý, «Bolashaq» pen «Nurly Jol» baǵdarlamalarynyń iske asýy týraly naqty mysaldar sóz boldy.
Sharada jekelegen taqyryptardy talqylaýmen qatar, arnaıy shaqyrylǵan qonaqtar búgingi elimizdegi ózekti máseleler men olarǵa qatysty sheshimder týraly óz oılaryn ortaǵa saldy. «Nur Otan» partıasynyń hatshysy Ǵabıdýlla Abdrahımov partıanyń jańǵyrýyna baılanysty bastamalary jaıly sóz qozǵady. Aldaǵy eki aıda partıa halyqty alańdatqan máselelerge baılanysty naqty usynystaryn jınaıtyn «Qoǵamdyq bastama» onlaın-petısıalar alańyn júzege asyrady. Usynystar daýys berý arqyly basqa da azamattardan qoldaý tapsa, partıa mindetti túrde talqyǵa salmaq. Bul qural qoǵamnyń kóńil kúıin anyqtap qana qoımaı, azamattardy mazalaǵan máselelerdiń sheshimin tabýǵa kómektesedi jáne halyq pen memleket arasynda kópirge aınalady dep senedi. Sondaı-aq, partıa hatshysy oblys ákimderin taǵaıyndaýǵa baılanysty «partıalyq nomınasıa» jobasyna toqtaldy. Ákimderdi tańdaý barysyna jergilikti turǵyndardyń qatysýyn qolǵa almaq.
Sondaı-aq, master-klass qonaqtary búgingi ózekti taqyryptarda óz pikirlerin bildirdi. «ForteBank» AQ basqarma basshysy Maǵjan Áýezov bank sferasyndaǵy sońǵy ózgerister jaıly talqylasa, «Samruq-Qazyna» AQ Adam resýrstaryn basqarý jáne komýnıkasıa jónindegi basqarýshy dırektory Ulan Tájibaev mádenı jańǵyrý tájirıbesi taqyrybynda sóz qozǵady. Al Eýrazıalyq ıntegrasıa ınstıtýtynyń dırektory Ǵanı Nyǵymetov rýhanı jańǵyrý uǵymyn ózgeristerdi basqarý arqyly túsindirip, kez kelgen ózgeris ózimizdiń júris-turysymyzdan bastaý alý kerektigin aıtty.
Master-klass sońynda qatysýshylary Nursultan Nazarbaevtyń kóregendik, sheshim qabyldaý qabilettigi men qıyn tańdaý jasaý, pragmatızm syndy kóshbasshylyq qasıetterin atap ótti.
