«Medıa orda» qoǵamdyq qory men «Aıtys aqyndary men jyrshy-termeshiler odaǵynyń» uıymdastyrýymen  2017 jyldyń 4 jeltoqsan kúni saǵat 14:00-de «Qazaqkonsert» zalynda ótetin «Ashyq búdjet – ashyq qoǵam» atty Respýblıkalyq jas aqyndar aıtysy keıinge (ýaqyty belgisiz) shegerildi, dep habarlaıdy Qamshy.kz aqparat agenttigi.

Aldyn-ala kelisken «Alataý» dástúrli óner teatrynyń basshylary da, «Qazaqkonsert» zaly basshylary da alǵashqyda aıtysty ótkizýge qoldaý bildirip, kelisimshartqa otyryp, zaldyń jalǵa berý qarjysyn alyp, sońynan, qoldaý bildire almaıtyndaryn jetkizdi. Kelisimshartty úzip, sebep saldaryn túsindirip, qarjyny qaıtarǵan.

Texnıkalyq aqaýlardy alǵa tartyp, aıtysty ótkizýge eshqandaı múmkindik joq ekenin túsindirgen «Alataý» dástúrli óner teatr basshylary basqa sharalardy oıdaǵydaı ótkizip jatyr. Al, «Qazaqkonsert» ujymy mınıstrliktiń is-sharasy ótetinin alǵa tartyp, kelisimshartty buzdy. 

«Teatr basshylarynyń aıtysqa degen qurmetiniń bolmaǵandyǵynan dástúrli óner ógeı balanyń kúıin keship júrgendeı áserde qaldyq. Halyq aıtysty súıgen, sondyqtan aıtystyń jolyna eshkim bóget bola almaıdy.

Elbasy Nursultan Nazarbaev damyǵan otyz eldiń qatarynan kórinýdi nyqtap tapsyrǵany esimizde. Ashyq, ádil qoǵammen alysqa jetýdi murat etken memleket basshysynyń kóregen josparyn Qazaqstan halqy abyroımen oryndap shyǵýdyń jolynda. Tek, keıbir basshylar muny teris túsinip, oǵan barynsha kedergi bolýda.

Jas aıtyskerlerdiń el órkendeýine óz úlesin qosyp, ázil-qaljyńy aralas, týra sózimen, shynshyl ımprovızasıasymen xalyq súıgen ádemi aıtysty aldaǵy kúnder enshisinde ótkizetinin xabarlaımyz», - deıdi aıtysty uıymdastyrýshy  «Medıa orda» qoǵamdyq qory men «Aıtys aqyndary men jyrshy-termeshiler odaǵynyń» ujymy.

 Aqyndar aıtysynyń maqsaty: 

Elbasy Nursultan Nazarbaevtyń álemniń ozyq otyz eliniń qatarynan kórinýge bergen tapsyrmalaryn nasıhattaý;

Halyqqa adal qyzmet etý, týra joldy dáripteý;  

Aıtys ónerine qoldaý kórsetý; 

«Rýhanı jańǵyrý» baǵdarlamasynyń mańyzdylyǵyn pash etý;  

Eldiń damýyn, halyqtyń ál-aýqatynyń artqanyn, sóz bostandyǵyn, erkin oıly azamattarǵa arnalǵan qoǵamnyń qalyptasýy tóńireginde oılarmen bólisý;