Almatyda jumbaq jaǵdaıda joǵalǵan jigittiń máıiti tabyldy. 16 qarashada úıinen shyǵyp ketken Álıhan Eshimovti týystary tabandarynan taýsylyp, eki apta boıy izdegen bolatyn. Al, marqumnyń denesi onyń kóligi tabylǵan áýejaı mańyndaǵy kólden shyqqan. Onda da izdeýshiler kóldiń sýyn aǵyzyp, azaıtqannan keıin ǵana áreń taýypty, - dep habarlaıdy KTK.
24 jastaǵy jigit sol kúni kóligi buzylǵan dostaryna kómektesý úshin ketken eken. Túnde anasyna habarlasyp, keri qaıtatynyn eskertipti. Biraq, sodan beri habar-osharsyz ketken. Erteńine ol mingen kólik áýejaı mańaıyndaǵy kóldiń janynan tabylady. Al, kólik ishindegi jigittiń telefony, qundy zattary men qujattaryna eshkim tıispepti. Keıin Álıhandy izdeýge eriktiler toby qosylyp, tipti sarbazdar ıisshil ıttermen tóńirekti sholyp shyqqan. Qazir tabylǵan máıitke saraptama jasalyp jatyr. Polısıa tergeý sharalaryn bastap ketken.
