Tuńǵysh Prezıdent kúnine oraı Qazaqstannyń Reseıdegi elshiliginde Máskeýdegi qazaqstandyq ardagerlermen kezdesý ótti. Olar jańa ǵımarattaǵy mýzeıdiń ashylýyna qatysty. Shaqyrylǵan qonaqtardyń qatarynda - Máskeýlik qazaqstandyq ardagerler keńiesiniń músheleri, buryńǵy partıa jáne meleket qaıratkerleri, sonymen qatar ár jyldary elde Elbasymen birge qyzmet etken azamattar.
Mýzeıdi kórgen ardagerler 25 jyldyq Qazaqstan men Reseı dostyq qarym-qatynasynyń nátıjesinde túzelgen tarıhı derektermen etene tanysýǵa múmkindik aldy. Atap aıtsaq, kópshiliktiń nazaryna qaǵazǵa qattalǵan eki eldiń qundy qujattary usynyldy. Sondaı-aq táýelsiz memleketimizge tıesili eki el arasyndaǵy dostyq qarym-qatynasty aıǵaqtaıtyn jáne mańyzdylyǵyn kórsetetin qujattar men jeke toptamadan alynǵan kitaptar, syılyqtar jáne de basqa zattar tarıhı mýzeıden oryn tapty.
"Osyndaı mýzeıdiń Elshiliktiń ǵımaratynda ashylýy erekshe ári este qalarlyq, quptarlyq sheshim, -deıdi RAEN Akademıasynyń Vıse-prezıdenti Anatolıı Spısyn. - Qazaqstannyń jańa múmkindigin kórsetetin jáne de úlken baǵaǵa ıe keremet joba. Barlyǵy búge-shegesine deıin oılastyrylǵan. Munda Qazaqstan halqyn da, eldiń damýyn da, sondaı-aq elbasynyń tynymsyz eńbegin, onyń syrtqy saıası bastamalaryn jáne rýhanı, mádenı ulttyq jańǵyrýǵa erekshe mán bergen qyzmetin baıqaýǵa bolady. Árıne, mundaı mýzeıdiń Tuńǵysh Prezıdent kúnine oraı ashylýy tegin emes".
Sonymen qosa ol, reseılik bedeldi ǵalymdardyń aıtqan sózderin arqaý etip, sol kezde durys tańdalǵan ekonomıkalyq baǵdar Qazaqstannyń gúldenýine jetkizgenin aıtady. ""Órkendeý" sózin buryńǵy keńes elderi arasynda sırek kezdestiresiń, - deıdi Anatolıı Spısyn. – Sebebi 26 jyl boıy halqynyń ósip-ónýine júıeli jumys jasaldy".
Al Máskeýlik ardagerler Keńesiniń tóraǵasy Valerıı Temirbaev, Tuńǵysh Prezıdent kúni Sergeı Esenınniń sózin eske ala otyryp, óleń joldarymen alǵan áserin jetkizýge tyrysty: " Betpe bet kelgende ár nárseniń júzin kórmeısiń. Aýqymdy is tek alshaqtan kóriner". Onyń aıtpaǵy, shırak ǵasyr ótken soń ǵana jasalǵan eńbektiń qundylyǵyn baǵalaı bastaısyń.
"Shyndyǵyn aıtaıyn, biz burynyraqta aıtqan kóptegen sózderine kumánmen qaraıtynbyz,-dedi Valerıı Temirbaev. -Alaıda ýaqyt óte kele, jańa Astanany, halyqaralyq isterdegi jetistikterdi, ásirese Qazaqstan men Reseı arasyndaǵy jaqsy qarym-qatynasty kórgen soń jasalǵan eńbekti baǵalaısyń, pikiriń basqasha qalyptasady".
