Almaty oblysy Uzynaǵash selosynyń mańynda jolaýshylar avtobýsy aýdarylyp, sonyń saldarynan eki adam qaıtys bolǵan, dep jazady Qamshy.kz aqparat agenttigi.
«Jol apaty tańǵy saǵat 8:00-de Almaty-Bishkek jolynyń 62-shaqyrymynda boldy. Túsken aqparatqa sáıkes, eki adam qaza tapqan. Al Uzynaǵash selosynyń aýrýhanasyna túrli jaraqattarmen 10 adam jetkizildi, arasynda kámelet jasqa tolmaǵan bala da bar. Oqıǵa ornynda polıseı qyzmetkerleri jumys isteýde», - dep habarlady Almaty oblysy İİD baspasóz qyzmeti.
Vedomstvonyń málimetinshe, avtobýs salonynda 43 adam bolǵan. Avtobýs Shymkentten Almatyǵa qaraı shyqqan. 41 jastaǵy júrgizýshi rólge ıe bola almaı, sonyń saldarynan avtobýs aýdarylǵan.
Jol apaty faktisi boıynsha qylmystyq tergeý bastaldy.
