Memleket basshysy Nursultan Nazarbaev Germanıa Federatıvtik Respýblıkasynyń isker toptar ókilderimen kezdesti, dep jazady Qamshy.kz aqparat agenttigi.

Bul týraly Aqordanyń baspasóz qyzmeti habarlady.

Kezdesýge Germanıa ekonomıkasy Shyǵys komıtetiniń tóraǵasy Volfgang Búhele, «Knaýf» kompanıasynyń ıesi Nıkolas Knaýf jáne Germanıa Federatıvtik Respýblıkasynyń Qazaqstan Respýblıkasyndaǵy elshisi Rolf Mafael qatysty.

Memleket basshysy Astanaǵa iskerlik saparmen kelgen nemis bıznesmenderine tabys tiledi.

– Astanaǵa qosh keldińizder. Sizderdiń delegasıalaryńyz myqty qurammen kelipti. Sizder Úkimette kezdesýler ótkizip, Qazaqstannyń bıznesmenderimen de jolyǵasyzdar. Bul kezdesýlerdiń jemisti bolatynyna senimdimin, – dedi Nursultan Nazarbaev.

Qazaqstan Prezıdenti bıylǵy qazan aıynda Sochı qalasynda Germanıa Federatıvtik Respýblıkasy isker toptar ókilderimen ótkizgen kezdesýiniń nátıjeli bolǵanyn atap ótti.

Sondaı-aq, Memleket basshysy Qazaqstanda jumys istep jatqan nemis kompanıalarynyń kóp ekenin aıtyp, eki eldiń isker toptary arasyndaǵy yntymaqtastyqty nyǵaıtýdyń mańyzdylyǵyna nazar aýdardy.

Germanıa ekonomıkasy Shyǵys komıtetiniń tóraǵasy Volfgang Búhele kezdesýge múmkindik týǵyzǵany úshin Nursultan Nazarbaevqa alǵys aıtyp, Sochı qalasyndaǵy kelissózder barysynda qol jetkizilgen ýaǵdalastyqtarǵa toqtaldy.

– Qazaqstan men Germanıa arasynda qarqyndy ekonomıkalyq qarym-qatynas ornady. Onyń damýy 2017 jyly oń nátıje kórsetip otyr. Bul rette, Germanıaǵa Qazaqstannan keletin ımporttyń kólemi artyp kele jatqanyn atap ótken jón, – dedi V.Búhele.