2017 jyldyń jazynda Shyǵys Qazaqstan oblysyna jumys saparymen kelgen Qazaqstan Respýblıkasynyń Prezıdenti Nursultan Nazarbaev agroónerkásiptik keshen mekemeleriniń basshylaryn arzan shıkizatty satpaı, daıyn ónimderdi óndirý úshin kooperatıvterge belsene birigýge shaqyrdy. Bul sózdiń túp-tórkinin aýyl sharýashylyǵy salasynda eńbek etip júrgen adamdar birden túsindi. Qazirgi ýaqytta Shyǵys Qazaqstan oblysynda aýyl sharýashylyǵy salasyndaǵy kooperatıvterge 16 myń sýbekt birlesip otyr. 44 pılottyq kooperatıvter iske qosylǵan. Onyń ishinde 32 kooperatıv sút, 12 kooperatıv et baǵytynda jumys isteýde.

Osy kooperatıvterdi jabdyqtaýǵa 3,1 mlrd. teńge bólingen. Bunyń 2 mlrd. teńgesi Agrarlyq nesıe korporasıasynyń búdjettik nesıeleý baǵdarlamalary men Aýyl sharýashylyǵyn qarjylaı qoldaý qory arqyly jumyldyryldy. Al 1,1 mlrd. teńge qarjy ınstıtýttarynyń menshikti qarajaty bolyp tabylady.

Oblysta jalpy 17 400 bas sıyry bar 54 sút-taýar fermasy jumys istep tur. Bıylǵy on aıdyń ishinde bul sharýashylyqtar óńdeýshi kompanıalarǵa 60 myń tonna sút berdi. Jyldyq jospar 68 myń tonnany quraıdy. Ótken jyly osy kezeńde 14 myń tonna az óndirilgen bolatyn. Budan bólek, halyqtan taǵy 20 myń tonna sút satyp alyndy. Bul kórsetkish ótken jylmen salystyrǵanda 2,5 esege kóp.

Oblystyń agrarlyq sektoryna kórsetilgen memlekettik qoldaý bıylǵy jyly birshama artqan. Naqty aıtsaq, 18 mlrd. teńge sýbsıdıa bólindi (ótken jylmen salystyrǵanda 10% joǵary). Óndiriletin ónimniń eksporttyq áleýetin arttyrý úshin oblysta eki et kombınatynyń qurylys jumystary da bastaldy.

Bul jaıttardy Astana qalasyndaǵy Ortalyq komýnıkasıalar qyzmetinde ótken brıfıń barysynda sóz alǵan Danıal Ahmetov málimdedi.