Prezıdent Nursultan Nazarbaev qazaqstandyqtardy aqshasyn elde saqtaýǵa shaqyrdy, dep habarlaıdy Qamshy.kz aqparat agenttigi Sputnik Qazaqstan saıtyna silteme jasaı otyryp.
Ulttyq telekópir barysynda Nursultan Nazarbaev sheteldegi kapıtaldy elge qaıtarý boıynsha jumysty jalǵastyrý qajettigin qadap aıtty.
"Kapıtaldy Qazaqstannan shyǵaryp, shetelde ustap otyr. Onyń bir joly jalǵan nemese kúdikti eksport-ımport kelisimsharttaryn jasaý bolyp otyr. Qoldanystaǵy valútalyq zańnama jaýapkershilikten sytylyp ketýge múmkindik beredi, tikeleı shekteý joq. Baqytjan Ábdiruly (Baqytjan Saǵyntaev – premer-mınıstr), oǵan jol bermeý úshin erteńnen bastap zań jobalaryn ázirleýdi bastaý kerek", — degen memleket basshysy shettegi aqshany qoryqpaı elge ákelý úshin birneshe ret zańdastyrý naýqany júrgizilgenin atap ótti.
"Úsh ret ótkizdik, kimdi jaýapkershilikke tarttyq? Kimdi otyrǵyzdyq? Eshkimge tıisken joqpyz. Nege aqshany shette ustap otyrsyzdar?! Qazirgi álemdegi sanksıa jaǵdaıynda qaýip zor, eshkim de kómektese almaıdy. Elge qaıtaryńdar aqshany, taǵy qandaı kepil kerek? Qandaı zań, jarlyq kerek? Aıtyńdar, men isteımin. Muny istemeseńder, biz ózimiz isteımiz, sosyn renjimeńder", — dedi Elbasy.
Prezıdenttiń aıtýynsha, 18 otandyq kompanıa shetelde 12,5 mıllıard dollar ustap otyr.
Prezıdent kompanıalar men olıgarhtarǵa búkil eldiń kózinshe eskertý jasap, eldiń aqshasyn tyqpaýǵa shaqyrdy.
"AQSH álemdegi búkil ofshorlardy jarıa etti. Shveısarıada da eshkim tynysh otyra almaıdy. Anglıa búkil reseılik, onyń ishinde qazaqstandyq olıgarhtarǵa da esepshottaryn ashýdy talap etti. Neni kútip otyrsyzdar?! Aksıoner retinde úkimetke máseleni sheshýdi tapsyramyn. Árkimmen sóıles, eger istemese, onda basqa jolmen ol aqshany qaıtaramyn. Búkil Qazaqstannyń kózinshe eskertemin. Memleket ol aqshany tabý úshin jaǵdaı jasady, al endi eldiń aqshasyn tyǵyp otyrsyzdar. Jeter", — degen Nursultan Nazarbaev el ekonomıkasyna aqsha quıǵan kompanıalar men bıznesmenderdi úlgi etti.
"Sondyqtan, dostar, erkeleýdi doǵarý kerek. Shetelde ıahta, birneshe elde kotej alyp, shalqyp otyrsyńdar. Biz eshkimdi tekserip jatqan joqpyz, adal aqsha tabýǵa múmkindik berip jatyrmyz. Sondyqtan aqshany elge qaıtaryńdar. Aqshany elde, úıde ustaǵan qaýipsiz", — dep túıdi sózin memleket basshysy.
