Astanadaǵy Ulttyq ǵylymı kardıoxırýrgıa ortalyǵynda 60 jastaǵy er adamǵa jasandy júrek ımplantansıasy jasaldy, dep habarlaıdy Qamshy.kz aqparat agenttigi QazAqparatqa silteme jasaı otyryp.
"Buǵan deıin onyń sozylmaly júrek aýrýy bolǵan. Onyń ómirin tek jasandy júrek ımplantasıasy ǵana qutqaratyn edi. Donor da tabylmady. Sol sebepti biz jasandy júrek otasyn jasaǵandy jón kórdik. Qazir pasıenttiń jaǵdaıy jaqsy. Emxanadan shyǵýǵa daıyndalyp jatyr. Ota jasalǵaly beri bir jarym aı ótti. Bári oıdaǵydaı. Eshqandaı aqaýlyqtar baıqalmaıdy", - dedi Ulttyq kardıoxırýrgıa ortalyǵynyń basshysy Iýrıı Pá Astanada ótken baspasóz máslıxatynda. Aldaǵy ýaqytta osy ispetti taǵy tórt otany jasaý josparlanyp otyr.
Onyń aıtýynsha, jasandy júrek - "Carmat SA" atty fransýz kompanıasynyń ónimi. Kompanıa mamandary atalǵan qurylǵyny Eýropanyń aeroǵarysh jáne qorǵanys konsernimen birlesip shyǵardy. 2013 jyly "Carmat" markaly jasandy júrek alǵash ret synaqtan ótti. Ony 76 jastaǵy qarıaǵa salyp bergen. Týra 74 kúnnen keıin ol qaıtys boldy. Al keıingi pasıentter jasandy júrekpen 8-9 aı júrdi. Sol kezde kompanıa jańa apparattyń bir aqaýlyǵyn anyqtady. Jasandy júrekti uzaq paıdalanǵannan keıin qan motorǵa ketip otyrǵan. Artynan ol aqaýlyq jóndeldi.
Aıta keteıik, júrek jumysyn ustap turýǵa arnalǵan qurylǵylardyń basty maqsaty - pasıenttiń ómirin uzartý, donor tabylǵansha adap ómirin saqtaý. Al "Carmat" ispetti apparattar burynǵy júrekti tolyǵymen almastyrýǵa arnalǵan. Onyń qazirgi baǵasy - 1 mln eýro.
«Memleket te, ortalyq ta oǵan aqsha jumsap jatqan joq. Fransýz kompanıasy óz apparatyn synaqtan ótkizip jatyr. Sol sebepti bárin tegin berdi. Bári sátti bolsa, jasandy júrek apparattary kóptep shyǵarylady. Ol kezde baǵasy da tómen bolady", - deıdi QR Densaýlyq saqtaý vıse-mınıstri Lázzat Aqtaeva. Ortalyq basshylyǵy jasandy júrek ıesi - Qunanbaı Abyraevpen de kezdesýge ruqsat berdi.
Ortalyq basshylyǵy jasandy júrek ıesi - Qunanbaı Abyraevpen de kezdesýge ruqsat berdi. Aǵamyz qýanyshyn jasyra almaı, kóz jasyna da erik berdi. "Men qatty aýyrdym. Myna jaqqa kelgende júre almadym, arbaǵa otyrǵyzyp ákeldi. Sol endi...Qazir bári durys...Ózimdi jaqsy sezinemin. Iýrıı Pá meniń ekinshi ákem sıaqty. Ortalyq basshylyǵyna myń alǵys...60 jastan keıin ózimdi osylaı sezinemin dep oılaǵan joqpyn", - dedi Qunanbaı aǵa. Osy kezde jasandy júrek shıqyldaı bastady. Dárigerler oǵan kóp qobaljýǵa bolmaıtynyn aıtyp, pasıentti palatasyna alyp ketti.
