Patrıottyq ánderimen halyqtyń júreginen oryn alǵan ánshi Ibragım Eskendir endi bylǵary qolǵapty básekede baq synaıdy, dep jazady Qamshy.kz aqparat agenttigi.
Kásipqoı sportta baq synaýǵa búgin jolǵa shyqqan Ibragım Eskendir qamshy.kz-ke eksklúzıvti pikirin bildirdi:
«Bokspen 2001-2007 aralyǵynda KSRO chempıony, sovettik mektepti myqty meńgergen Amanjol Baqaev degen aǵanyń qolynda jattyqqanmyn. Sol kisiniń shákirtimin, qolynda jattyǵyp júrip Sport sheberinen úmitker boldym. 2007 jyly qolymnan jaraqat alyp qaldym, ári ata-anam qarsy bolǵan soń bokstan alystaý ketip, ary qaraı bilim qýyp, óner jarystyryp kettik.
Ónerde týymyzdy jelbirettik, endi sportta týymyzdy jelbiretsek degen ishte bir arman qalǵan edi. Alla buırsa 9 jeltoqsan kúni Máskeýde kásibı sport keshi bolady. Onda men kásipqoı bokstaǵy alǵashqy jekpe-jegimdi ótkizbekpin. Debútti jarysymda qarsylasym MMA-dan álem chempıony Sherǵaz Shaqtanov degen qyrǵyz boksshysy. Jaqynda boksqa aýysqan onyń da birinshi jepe-jegi. Sol jere elimizdiń namysyn qorǵaıtyn bolamyz. Biz qazaq balalary batyr eldiń urpaǵymyz ǵoı, bizde namys bar, rýh bar. Bir sózben aıtqanda 1,5 mıllıard qytaıdan shyqpaǵan álem chempıondary qazaqtan shyqty. Úlgi tutar aǵalarymyzdyń, baýyrlarymyzdyń jolymen Qazaqtyń týyn sharshy alańda jelbiretsem degen úmitim bar. Sol nıetpen jolǵa shyǵyp otyrmyz.
Meniń bokstan kórinýim ónerden ketti degen sóz emes, saıası qyzmetimnen ketti degen sóz emes, Eýrazıa ulttyq ýnıversıtetinde qazir doktarantýrada oqyp júrmin, ǵylymnan ketti degen sóz emes. Qazaqtyń balalary jan-jaqty bolýy kerek. Bárimizdiń ıleıtin pushpaǵymyz bireý, qazaqtyń balalary ultynyń namysyn qaı jerde bolsa da qorǵaýy kerek, - deıdi ózi aıtqandaı saıasatpen de aınalysyp júrgen tanymal ánshi.
