Eýropadaǵy qaýipsizdik jáne yntymaqtastyq uıymyna qatysýshy elderdiń syrtqy saıası vedomstvolarynyń basshylary EQYU Syrtqy ister mınıstrleri keńesiniń 24-shi otyrysyna jáne Uıymnyń ózekti mindetterin, sondaı-aq eýro-atlantıkalyq jáne eýrazıalyq keńistiktegi syn-tegeýrinderdi talqylaý úshin Venada jınalǵan.
Otandyq delegasıany Syrtqy ister mınıstri Qaırat Ábdirahmanov basqaryp, onyń baıandamasy Keńestiń birinshi plenarlyq otyrysyn ashty. Otyrys qatysýshylaryna joldaǵan úndeýinde ol Qazaqstan Prezıdentiniń belsendi qyzmetiniń arqasynda Uıymnyń HHİ ǵasyrda qabyldanǵan jalǵyz saıası qujaty – 2010 jylǵy EQYU Samıtiniń Astana deklarasıasynda belgilengen ıdeıalary men qaǵıdattardyń ózektiligi saqtalatynyn atap ótti.
Q. Ábdirahmanov áriptesteriniń nazaryn jalpyǵa ortaq dıalog pen janjaldy jaǵdaılarǵa birlese jaýap qaıtarý jáne olardyń aldyn alý boıynsha kelisilgen is-sharalardy júzege asyrýdy jalǵastyrýdyń mańyzdylyǵyna aýdardy. Sonymen birge, Qazaqstannyń basymdyqtary BUU Qaýipsizdik Keńesiniń turaqty emes múshesi jáne Eýrazıa aýmaǵyndaǵy medıasıa áreketteri retinde anyqtalady.
Otandyq dıplomat Jahandyq lańkestikke qarsy koalısıa men Terorızm men ekstremızmge qarsy jahandyq is-qımyl boıynsha áreket kodeksin qurý týraly Prezıdent Nursultan Nazarbaevtyń negizgi bastamalaryn usynyp, EQYU-nyń SHYU, UQSHU jáne 2018 jyly Qazaqstan tóraǵalyq etetin Azıa keńesimen ózara yqpaldastyǵyn nyǵaıtý úshin naqty qadamdardy iske asyrýǵa shaqyrdy.
Mınıstr aǵymdaǵy jáne bolashaqtaǵy qaýipsizdik salasyndaǵy áskerı syn-tegeýrinder boıynsha qurylymdy dıalogtyń bastalǵanyn joǵary baǵalady. Bul mehanızm senimdi qalpyna keltirý jáne áskerı belsendiliktiń,áskerler konsentrasıasynyń jáne onyń saldary retinde áskerı oqıǵalar qaýpiniń ósýine jol bermeý maqsatynda EQYU aýmaǵyndaǵy qarý-jaraqqa baqylaý jónindegi dıalogty iske qaıta qosý úshin arnalǵan. Elimizdiń oǵan belsendi qatysýyna ázirligi rastaldy.
Qazaqstan tarapynyń pikirinshe, EQYU sheńberinde pátýa, turaqtylyq pen yntymaqtastyqty qurý boıynsha Uıymnyń ekonomıkalyq-ekologıalyq ólshemi de syndarly ról atqarýy tıis. Bul baǵytty odan ári damytýdyń negizi – Prezıdent N.Nazarbaevtyń bastamalaryna tolyǵymen sáıkes keletin jahandyq jáne óńirlik ıntegrasıalyq úrdisterdi biriktirý bolýy múmkin.
Sonymen qatar, Q. Ábdirahmanov EQYU-nyń Bas hatshysy Tomas Grımıngerdiń taqyryptyq mısıalardy qurý jónindegi bastamasyn quptady. Bul turǵyda Qazaqstan syrtqy saıası vedomstvosynyń basshysy EKSPO-2017 alańyn Astanada «EQYU-nyń ózara baılanys jáne jasyl ekonomıka jónindegi Ortalyǵyn» ornalastyrý úshin qoldanýdy usyndy.
Qazaqstan Syrtqy ister mınıstriniń tóraǵalyǵymen ótetin SİMK qarsańynda taraptar EQYU-nyń kún tártibindegi tásilder jáne eki uıym arasyndaǵy yntymaqtastyqtyń ózekti máseleleri boıynsha pikir almasýoryn alǵan UQSHU-ǵa múshe-memleketter syrtqy ister mınıstrleriniń beıresmı kezdesýi ótti. Mundaı yntymaqtastyqtyń yqtımal baǵyttary retinde Qazaqstan, UQSHU-ǵa tóraǵalyǵynyń óziniń basymdyqtary turǵysynda, terorızm, kıber qaýipsizdik jáne zańsyz esirtki aınalymyna qarsy kúreske erekshe nazar bólýdi usyndy.
Birinshi kúni SİMK aıasynda Q.Ábdirahmanov Aýstrıa, Italıa, Makedonıa, Mońǵolıa, Nıderland, Estonıa men Eýropalyq Odaq delegasıalarynyń basshylarymen ekijaqty kezdesýler ótkizip, áriptesterimen ekijaqty jáne kópjaqty yntymaqtastyqtyń ózekti máselelerin talqylady.
Eýropalyq seriktestermen oryn alǵan pikir almasýlar barysynda otandyq dıplomat Qazaqstan men Eýropa elderiniń azamattary arasyndaǵy baılanystardy nyǵaıtý, onyń ishinde vızalyq rejımdi jeńildetý qajettigin atap ótti.
EQYU-nyń is basyndaǵy tóraǵasy – Aýstrıanyń Syrtqy ister jáne ıntegrasıa mınıstri Sebastán Kýrspen kezdesýi barysynda Qazaqstan-Aýstrıa qarym-qatynastarynyń búkil máseleleri boıynsha pikir almasý oryn aldy. Erekshe nazar saýdany ártaraptandyrý múmkindikterine qoıylyp ekonomıkalyq yntymaqtastyqtyń damýyna, sondaı-aq quqyq qorǵaý organdary arasyndaǵy tikeleı baılanys ornatýdy,ekijaqty kelisimderge qol qoıýjáne Qazaqstannyń Eýropa Keńesiniń quqyqtyq quraldaryna qosylýdy qamtıtyn quqyq salasyndaǵy yntymaqtastyqqa aýdaryldy.
Sonymen qatar, Q.Ábdirahmanov S.Kýrs basqaryp otyrǵan Aýstrıalyq halyq partıasynyń bıylǵy qazan aıynda parlamenttik saılaýyndaǵy jeńisimen quttyqtady jáne úkimet qalyptastyrýda tabystar tilep, Qazaqstanǵa saparmen kelýge shaqyrdy.
Eýropalyq Odaq Syrtqy saıası qyzmetiniń Bas hatshysy Helga Shmıtpen jahandyq kún tártibi boıynsha kólemdi áńgime boldy. Dıplomattar Irannyń ıadrolyq baǵdarlamasy jónindegi birlesken keshendi is-qımyl josparyn júzege asyrý máselelerin, Taıaý Shyǵys jáne Aýǵanstandaǵy ahýaldy egjeı-tegjeı qarastyrdy. Eýropalyq tarap Qazaqstan Prezıdentiniń ıadrolyq qarýdy taratpaý jáne qarýsyzdaný salasyndaǵy kúsh-jigerin, sondaı-aq eýrazıalyq qurlyǵyndaǵy janjaldy jaǵdaılardy retteý úderisindegi rólin atap ótti.
EQYU Syrtqy ister mınıstrleri Keńesiniń otyrysy 8 jeltoqsanda jalǵasady jáne birqatar mınıstrlik sheshimder men deklarasıalardy qabyldaýmen aıaqtalady.
