Almatyda «Qýanysh syıla» atty qaıyrymdylyq sharasy ótti.

Táýelsizdik kúniniń qarsańynda Halyk Arena sport kesheninde múmkindigi shekteýli balalar men jasóspirimderge arnalǵan "Qýanysh syıla" qaıyrymdylyq sharasy ótti.

Aksıa aıasynda balalar “Almaty” xokkeı klýbymen tanysyp, kásipqoı xokkeıshilermen sheberlik sabaǵyna qatysty. Óz kezeginde, sportshylar tájirıbelerimen bólisip, qyzyqty da tartysty oıyn úlgisin kórsetti. Hokeıden Almatyq komandanyń resmı fan-klýby “Forza” da oıynshylarǵa qoldaý kórsetip, jaqsy kóńil-kúı syılady.

Uıymdastyrýshylar qonaqtardy balalarǵa arnalǵan shoý, anımatorlar jáne kloýndardyń qatysýymen ótken kishigirim konserttik baǵdarlamamen qýantty. Saltanatty keshki as pen syılyqtardy tabystaý rásimi balalardyń qýanyshyn eseleı tústi.

– Bizge barlyǵy unady. Búgin kınoǵa baryp, tamaqtanyp, Halyq Arenaǵa keldik. Sondaı-aq, tamasha xokkeı oıynyn tamashaladyq. Bizdiń balalar sportty jaqsy kóredi. Onymen qosa, bizde júzý, armrestlıng syndy sport túrlerinen álemdik dodalardyń qatysýshylary da bar. Búgin balalar úshin keremet mereke ótti. Olarǵa qýanysh syılaǵan uıymdastyrýshylarǵa degen alǵysymyz sheksiz, – dep bólisti «Aqjol» qaıyrymdylyq qorynyń ókili Rýshana Tahtahýnova.

Shara uıymdastyrýshylary: “Almaty” xokkeı klýby” jáne “Almatyqalasynyń sporttyq nysandar dıreksıasy”. Olardyń aıtýynsha, jastardy kásipqoı sportshylarmen tanystyrý, sportqa baýlý olardyń salaýatty ómir saltyn ustanýyna septigin tıgizeri sózsiz.

– Biz Táýelsizdik kúnine osyndaı mereke uıymdastyryp, “Amal-ıman” jáne “Aq jol” qoǵamdyq qorlarynyń 60 balalary men jasóspirimderine  arnap ótkizdik. Olar xokkeı oıynyn tamashalap, bizdiń xokkeıshilermen tanysty. Uıymdastyrýshylar atynan biz olarǵa mektepke arnalǵan qural-jabdyqtar men estelik syılyqtaryn tabystadyq, – dep bólisti “Almaty” xokkeı klýbynyń dırektory Erjan Aıdarxanov.

Aıta ketsek, “Almaty” xokkeı klýby balalardy xokkeı bólimderine qabyldaýda. Tolyq málimetti “Almaty” xokkeı klýbynyń resmı áleýmettik jelilerindegi paraqshalarynan taba alasyzdar. Sonymen qatar, jaǵdaıy tómen otbasylardan shyqqan jáne daryndy, jaqsy nátıjeler kórsetken balalarǵa tegin baǵdarlamalar qarastyrylǵan.