Darıǵa Nazarbaeva Almatydaǵy Fýrmanov kóshesi ataýynyń ózgergenine qatysty pikir bildirdi.
Almaty qalasyndaǵy Fýrmanov kóshesi Nursultan Nazarbaev atyndaǵy dańǵyl bolyp ózgertilgen bolatyn. Osy oraıda Senat depýtaty Darıǵa Nazarbaeva atalǵan máselege qatysty óz pikirin aıtty.
«Men bul týraly jana ǵana bildim. Maǵan túrli sebepterge baılanysty sizderdiń suraqtaryńyzǵa obektıvti jaýap berý qıyn. Biraq óz elin jaqsy kóretin azamat retinde jáne onyń táýelsiz 25 jylda jetken jetistigin maqtan tutatyn adam retinde men atalǵan sheshimdi durys dep sanaımyn. Kóshbasshymyz úlken qurmetke laıyqty. Onyń arqasynda ómirimiz beıbit jáne tynysh ótýde», – dedi ol Senat otyrysynan keıin jýrnalıserge.
Osy oraıda senat depýtaty elimizdiń 25 jylda qýatty memleketke aınalǵanyn atap ótti.
«Sońǵy 10-15 jylda ekonomıkamyz ben saıası júıemiz barlyq qıyndyqqa qarsy tótep berdi. Bul 25 jylda qýatty da turaqty memleketti qura bilgenimizdi kórsetedi. Elimiz – osy óńirdegi kóshbasshy memleket. Sondaı-aq biz prezıdentimizdiń álemde bedeliniń joǵary ekenin bilemiz. Ol ıadrolyq qarýǵa qarsy jáne halyqaralyq terorızmmen kúresý jóninde ǵalamdyq mańyzy bar bastamalardy kóterdi», – dedi Darıǵa Nazarbaeva.
Sonymen qatar ol elimizdiń álemdegi beıbitshilikke qosqan úlesin joǵary baǵalady.
«Biz – álemde ıadrolyq qarýdan óz erkimen bas tartqan alǵashqy memleketpiz. Sizder Astananyń janjaldasýshy taraptarǵa úmit beretin, kezdesý alańyna aınalǵanyn jaqsy bilesizder. Sondaı-aq halyqaralyq jáne óńiraralyq deńgeıdegi máselelerdi sheshýge óz úlesimizdi qosýdamyz. Eger atalǵan jaǵdaıǵa ádil ári obektıvti baǵa beretin bolsaq, Elbasy joǵary qurmetke ıe. Ol tarıhta qalatyn azamat», – dedi senator BAQ ókilderine.
