Marjan Turlybaeva... Bul esimdi búginde biri bilse, biri bilmes. Aqyl-esi durys bolsa da, ómiriniń segiz jylyn jyndyhanada ótkizgen boıjetken. Birneshe jyl buryn Marjannyń taǵdyry búkil áleýmettik jelide de, jańalyqtarda da aıtylǵan bolatyn. Sol kezden bastap Marjannyń taǵdyryna, ómirine alańdaǵan, kóńil bólgen, janashyrlyq tanytyp, tileýles bolǵan halyqtyń qarasy kóp edi. Onyń ishinde basym kópshiligi elimizdiń jaryq juldyzdary.
Marjan jyndyhanada jatqan kezinde halyqtan kómek surap hat jazǵan bolatyn.
«Shalqyp júrsińder, adamdar. Myna jaqta 8 jyl emes, 8 saǵat otyra almas edińder. Óńkeı aqyly aýysqan adamdardyń ortasynda. Adamdar ózderińizdi meniń orynyma qoıyp kórińizdershi, týǵannan shesheleriń tastap ketedi, ananyń jylýyn sezbeı, jetimxanada jylap óstim, sóıtip júrgende on jasymda bir áıel kep «anańmyn» dep áketip, úıine aparyp kórsetpegendi kórsetedi, aqyry menen qutylý úshin jyndyxanaǵa jaýyp tyndy. Tiri ákemdi «ákeń jyndyxanada ólgen, sen de sóıtesiń» dedi. Ákem tiri bolsa, óldi degen anyqtama jasatqan ba? Ol da satyla ma? Masqara. Meniń qazirgi dárethanaǵa tastalyp jatqan baladan esh aıyrmashylyǵym joq qoı sonda. Ol áıel meni shyǵarmas úshin jylasa da syqtasa da, bárin istep júrgen bolar, ony jaqsy bilem. Sonda ana júregi jylymasa da, ar aldynda óz-ózinen uıalmaı ma? Qudaıdan qoryqpaı ma? On toǵyz jylym osyndaı azappen ótti. Alty-aq synyp bilimim bar, maǵan áli atestat alý kerek, oqý kerek, turmys qurý kerek. Ýaqyt degen zýlap ótip jatyr. Al Shymkenttegi «artyn» oılaǵandar bir-birine siltep, isti júrgizýge, meni bosatýǵa asyǵar emes! Ótinem sizderden, osy is ádil sheshimin tabý úshin qoǵam bolyp kómektesińizdershi» dep halyqtan kómek suraǵan bolatyn. Bul jazba búkil qazaq balasynyń júregine pyshaq suǵyp alǵandaı bolǵan edi.
2016 jyldyń mamyr aıynda Marjan óziniń aqyl esiniń durys ekenin dáleldep shyqqan bolatyn.Sol kezde Marjannyń qýanyshyna qýanbaǵan adam bolmaǵan shyǵars sirá?
Buryndary búkil BAQ betin shýlatqan Marjannyń esimin qazir estimeıtin boldyq. Búgingi qal-jaǵdaıy qandaı, sońǵy jyldardaǵy ómiri qalaı ózgerdi, osy jáne ózge de suraqtardyń jaýabyn bilý úshin Qamshy.kz aqparat agenttiginiń tilshisi Marjannyń ózimen suhbattasqan edi.
- Marjan, sizdiń jaǵdaıyńyzǵa alańdamaǵan qazaqstandyq joq shyǵar? Qazirgi jaǵdaıyńyz qalaı?
Allaǵa shúkir jaqsy. Keshte bolsa mektepte bilim aldym. Joǵarǵy oqý ornyna tústim.
Ómirińizdiń sońǵy jyldary qalaı ózgerdi?
Ómirimniń sońǵy jyldarynda da kóp qıynshylyqtar boldy. Jyndyhanadan shyqqannan keıinde kóptegen qıynshylyqtardy bastan ótkerdim. Shyny kerek jyndyhanadan shyqqannan keıin barlyǵy artta qalady dep oılap edim, biraq olaı emes eken. Qazirgi tańda bilim alyp júrgenim bolmasa, basqa eshqandaı ózgeris bolǵan joq.
Alǵa qoıǵan maqsatyńyzben josparyńyz qandaı?
Meniń aldaǵy josparym aıaqqa turyp ketý. El qatarly bilim alyp, óz-ózimdi jetildirsem deımin.
Armandaryńyz qandaı?
Men bala kúnimnen aktrısa bolýdy armandaıtynmyn. Al búginde jýrnalıs bolǵym keledi. Jýrnalıs bolǵym keletin sebebim men jýrnalıser men halyqtyń arqasynda el qataryna qosyldym. Ekinshi armanym jaqsy jar kezdestirip, otbasyn qurý. Jalpy aıtqanda el qatarly jaqsy ómir súrgim keledi.
Basyńnan qanshama qıynshylyqtar ótti. Al sizdi alǵa jetelep, súıregen ne nárse?
Men segiz jyl jyndyhanada turdym, ómir súrdim. Men sol kezde óz-ózimdi quzǵa laqtyra salýyma bolatyn edi, biraq meni bir nárse alǵa súıredi. Ne nárse alǵa súıregenin ózimde bilmeımin. Bálkim armanym shyǵar, ómirdi jaqsy kórýim shyǵar. Adam bolyp ómirge keldim be, adam bolyp ómirden ótkim keldi.
Ómirdegi ókinishińiz ne?
Shyny kerek meniń jıyrma jylymda ókinishke toly. Anam meni dúnıege ákelgeniniń ózi ómirimdi qurtty deýge bolady. Birese balalar úıinde, birese jyndyhanada boldym. Ata-anam qatelik istemegende men mundaı ómir súrmespe edim. Jalǵyzdyqty kórmespe edim, jetimniń kúıin keshpespedim dep oılaımyn. Men taǵdyrdyń basqa salǵanyna kóndim. Biraq meniń janymdy jegideı jeıtin bir-aq nárse, ol- jalǵyzdyq. Bul meniń taǵdyrym. Bar ómirim alda dep óz-ózimdi jubatýmen kelemin.
Suhbatyńyzǵa rahmet!
Suhbattasqan: Aqnur Muhtarhan
