Aqtóbe oblysynyń tilderdi damytý basqarmasy janyndaǵy Tilderdi oqytý ortalyǵy uıymdastyrýymen S.Báıishev atyndaǵy ǵylymı-ámbebap oblystyq kitaphanasynda «Til jańǵyrýy: qazaq tiliniń jańa álipbıi jáne jahandyq bilim berý keńistigi» atty oblystyq semınar ótti.

Semınardyń maqsaty Elbasy N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgen 6-baǵyt «Latyn grafıkalyq júıege kóshý» kezeńderine, qaǵıdalaryna sholý, qazaq tiliniń latyn grafıkasyna negizdelgen jańa álipbıin kópshilikke tanystyra otyryp, oı bólisý, pikirlesý.

Atalǵan sharaǵa joǵary oqý oryndarynyń profesorlary, oqytýshylar quramy, tilshi-ǵalymdar, oblystyń fılolog mamandary, memlekettik qyzmetshiler sondaı-aq halyqqa qyzmet etý salasy qyzmetshileri qatysty.

«Semınardyń maqsaty — Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgen altynshy baǵyt «Latyn grafıkalyq júıege kóshýdiń» kezeńderine, qaǵıdalaryna  sholý, elimizdegi rýhanı jańǵyrý tetigi — qazaq tiliniń latyn grafıkasyna negizdelgen jańa álipbıin kópshilikke túsindirý jáne keńinen tanymal etý, jahandyq bilim berý keńistigine enýde kóptildiliktiń mańyzy týraly  pikirlesý», — deıdi Aqtóbe oblysynyń tilderdi damytý basqarmasy janyndaǵy Tilderdi oqytý ortalyǵynyń ádiskeri Aqmaral Súgirbaeva.

Sharanyń alǵashqy bóliminde Q.Jubanov atyndaǵy Aqtóbe óńirlik memlekettik ýnıversıtetiniń dosenti, f.ǵ.k. N.A.Sadýaqas «Jańa álipbıdiń qurylymy men qyzmeti» týraly tereń aqparat berip, qazaq tiliniń jańa álipbıi el bolashaǵy úshin jasalǵan ıgi qadam ekendigine toqtaldy.

Sonymen qatar «Latyn álipbıi ádebı shyǵarmalar negizinde» taqyrybyndaǵy S.Báıishev atyndaǵy Aqtóbe ýnıversıtetiniń PhD, f.ǵ.k., dosent T.J.Toqsanbaevanyń, «Bolashaq medısına salasy qyzmetshilerin daıyndaý máselesindegi jańa álipbıdiń mańyzy» týraly Marat Ospanov atyndaǵy Batys Qazaqstan memlekettik medısına ýnıversıteti Úzdiksiz kásibı damý ortalyǵynyń oqytýshysy N.A.Rysmaǵambetovanyń, Q.Jubanov atyndaǵy Aqtóbe óńirlik memlekettik ýnıversıtetiniń Orys fılologıasy jáne mádenıetaralyq komýnıkasıa kafedrasynyń aǵa oqytýshysy A.T.Sagıevanyń «Perehod na latınısý – ýkreplenıa treházychıa v Kazahstane» taqyrybyndaǵy baıandamalarynda álemdik bilim berý keńistigindegi jańa álipbıdiń mańyzy men róli, bolashaq mamandardyń kóptildi tulǵa retinde básekege qabilettiligin arttyrýǵa tıgizer yqpaly týraly aıshyqty oılarymen bólisti.

Sonymen qatar, «Erkin mıkrofon» bóliminde ortalyqpen tyǵyz qarym-qatynas jasap otyrǵan mekemeler, onyń ishinde M. Bókenbaev atyndaǵy Aqtóbe zań ınstıtýty, Aqtóbe oblystyq soty, Aqtóbe oblysynyń İshki ister departamenti, qalalyq İshki ister basqarmasy, oblystyq Statısıka departamenti, №6655 áskerı bólimi sarbazdary, oblystyq Tótenje jaǵdaılar departamentiniń jedel-qutqarý jasaǵy qyzmetshileri men memlekettik tilge jaýapty mamandary kókeıindegi suraqtaryn qoıyp, aldaǵy ýaqytta Tilderdi oqytý ortalyǵymen mekemeleri arasyndaǵy yntymaqtastyq damı túsýine nıetti ekendikterin bildirdi.

Sondaı-aq Tilderdi oqytý ortalyǵy ujymyna Marat Ospanov atyndaǵy Batys Qazaqstan memlekettik medısına ýnıversıteti rektory E.J. Bekmýhambetovtiń óz rızashylyǵyn bildirgen alhysqaty tabystaldy.

Shara sońynda qatysýshylarǵa syılyq retinde kitaptar taratyldy.