Bizdiń halyq, bile-bilseń, bir ǵajap!
Súıe tura,
Birin-biri júr qajap.
Qansha jaqsy kórse-daǵy áıelin
Bildirmeýge tyrysady bul qazaq.
Aq mataǵa qaı boıaý da juǵady,
Juqqany úshin kináli bop shyǵady.
Keıde qazaq áıeline "Áı!" deıdi,
Áıeli ony "Aı!" dedi dep uǵady.
El jyrtyǵyn aqylmen er jamaǵan.
Al doly áıel qaı kezde de qabaǵan.
Sonyń ózin
"Oıbaılatyp"
Babamyz
Ústerine ton kıgizip "sabaǵan".
Qaıtkende de
"Áı!" degennen úrikpe.
Jar qolynda qaı kezde de shúrippe.
Kúıeýine istetedi degenin,
"Zardap shegip",
"Taıaǵyn jep" júrip te!
Qadyr Myrza Álı
