Parlament Senaty depýtattarynyń aldynda sóz sóılegen Memleket basshysy elimizdegi quqyq qorǵaý qyzmetiniń prosesýaldyq negizderin jańǵyrtý úderisine toqtalyp, bul júıede kadrlyq ózgerister jasaýdyń qajettiligin atap ótti, dep jazady Qamshy.kz aqparat agenttigi.

Bul týraly Aqordanyń baspasóz qyzmeti habarlady.

– Igor Rogov zeınet jasyna jetti. Zańnamaǵa sáıkes ol atqaryp otyrǵan qyzmetinen bosatyldy. Sińirgen eńbegi men atqarǵan jemisti jumysy úshin oǵan alǵys aıtamyn. Konstıtýsıalyq Keńestiń tóraǵasy bolyp Qaırat Ábdirazaquly Mámı taǵaıyndaldy, – dedi Elbasy.

Osyǵan baılanysty, Nursultan Nazarbaev Qaırat Mámıdi Joǵarǵy Sot tóraǵasy laýazymynan bosatý týraly usynys engizip, bul qyzmetke Jaqyp Asanovtyń kandıdatýrasyn usyndy.

– Bul kezdeısoq tańdaý emes. Biz jańa zańnyń qabyldanýyna baılanysty sot-quqyq qorǵaý júıesin jańǵyrtýdyń kelesi kezeńine qadam bastyq. Sondyqtan sot organdarynyń jańa basshysy ony tıimdi ári jyldam iske asyrýdy qamtamasyz etýi kerek. Nátıjesinde Qazaqstandaǵy sot tóreligi neǵurlym damyǵan ári ádiletti bolýǵa tıis. Jaqyp Asanovtyń kandıdatýrasy osy joǵary talaptarǵa tolyq saı keledi dep oılaımyn, – dedi Qazaqstan Prezıdenti.

Qazaqstan Prezıdenti Joǵarǵy Sot tóraǵasy laýazymyna usynylǵan kandıdattyń jeke qasıetteri men kásibı mashyqtaryn atap ótti, sondaı-aq Qaırat Mámıge elimizdiń sot júıesin damytýǵa qosqan úlesi úshin alǵys aıtty.

Budan bólek, Nursultan Nazarbaev Bas prokýror laýazymyna Qaırat Qojamjarovtyń kandıdatýrasyn Parlament Senatyna kelisý úshin usyndy.

– Ol Memlekettik qyzmet isteri jáne sybaılas jemqorlyqqa qarsy is-qımyl agenttiginde uzaq jyl jumys istedi. Basshylyq qyzmettegi jáne prokýratýra organdaryndaǵy tájirıbesi mol. Onyń Bas prokýror laýazymyna aýysýyna baılanysty Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy bolyp Alık Shpekbaev taǵaıyndalady, – dedi Memleket basshysy.

Parlament Senatynyń depýtattary ashyq daýys berý arqyly Q.Mámıdi Joǵarǵy Sot tóraǵasy laýazymynan bosatý jáne osy qyzmetke J.Asanovty taǵaıyndaý týraly qaýly qabyldap, sondaı-aq Q.Qojamjarovtyń kandıdatýrasyn Bas prokýror laýazymyna taǵaıyndaýǵa kelisim berdi.

Sońynda Qazaqstan Prezıdenti elimizdiń sot jáne quqyq qorǵaý júıesinde sapaly ári ýaqtyly reformalar júrgizýdiń mańyzdylyǵyna taǵy da nazar aýdardy.