Montereıge ıadrolyq qarýdy taratpaý jónindegi Djeıms Martın ortalyǵyndaǵy shyǵys-azıalyq baǵdarlamasynyń dırektory Djeffrı Lúıs Koreı túbegindegi bastalýy múmkin janjaldyń senarıin jazdy.
Lúıstiń oıynsha, 2019 jyldyń naýryzynda bitpeıtin bultarystardan qajyǵan Soltústik Koreıa óz shekarasyndaǵy azamattyq ushaqty amerıkalyq bombalaýshy dep oılap, qulatyp túsiredi. Bul týraly Lenta.ru jazdy.
Buǵan jaýap retinde Ońtústik Koreıa prezıdenti Mýn Chje In irgeles aýmaqtyń nysandaryna soqqy jasaýǵa buıryq beredi.
Sol ýaqytta AQSH prezıdenti Tramp óziniń Tvıtterdegi paraqshasyna «Kishkentaı zymyran-adam uzaqqa barmaıdy» dep jazady. Muny Phenán tikeleı qoqan-loqy dep túsinip, ıadrolyq qarý tastaýǵa nusqaý beredi.
Olardyń keıbir bóligi maqsatqa jetkizbeıdi, alaıda qalǵan bóliginiń Japonıa men Ońtústik Koreıaǵa soqqy jasaýǵa múmkindigi bar. Óz kezeginde AQSH KHDR-ǵa bastyrmalata soqqy jasaıdy. Al Kım Chen Yn qalǵan zymyrandardy jiberýge buıyrady. Nátıjesinde San-Dıego, Perl-Harbor, Nú-Iork jáne Vashıngtondaǵy áskerı bazalar jarylady.
Manhettenge tikeleı jiberilgen zymyran saldarynan mıllıondaǵan adam kóz júmady, Vashıngtonda 300 myńdaı adam qyrylady. Tramp Florıdadaǵy jer asty býnkerinde jasyrynyp, aman qalady. Kım Chen Ynnyń denesi úıinde óli tabylady, sebebi ol ózi-ózine qol jumsaıdy.
5 qazanda Phenánnyń janjal jaǵdaıyndaǵy Seýl men Tokıoǵa jasaǵan ıadrolyq soqqysy 2 mıllıon adamnyń ómirin jalmaýy múmkin ekeni habarlanǵan. Sarapshylar KHDR-dyń balıstıkalyq zymyrandarǵa arnalǵan 25 ıadrolyq oqtyǵy bar ekenin aıtyp, báriniń bir ýaqytta qoldanylatynyn eskertken.
