QR Din isteri jáne azamattyq qoǵam mınıstri Nurlan Ermekbaev osy kúnderi Abý-Dabıde ótip jatqan musylman qoǵamynda beıbitshilikti nyǵaıtý boıynsha «Álemdik beıbitshilik jáne Islamofobıa» taqyrybyndaǵy IV halyqaralyq forýmǵa qatysty dep habarlaıdy Qamshy.kz aqparat agenttigi. 

Forýmnyń maqsaty – ıslamofobıanyń mazmuny men sebepterin jáne din salasynda bolyp jatqan prosesterdi oı eleginen ótkizý, Islam dininiń burmalanýyn boldyrmaý, sondaı-aq toleranttylyq, beıbitshilik pen ádilettilik mádenıetin nasıhattaý bolyp sanalady.

«Biz musylmandar, ıslamofobıaǵa qarsymyz, biraq biz bul úshin jaýapkershiliktiń bir bóligi ózimizde  jatqandyǵyn moıyndaýymyz kerek. Bul jerde dinı fanatıkter men provakatorlarǵa joǵary rýhanı qundylyqtardy tárbıeleýdiń ornyna, ózderiniń radıkaldy kózqarastary men tásilderin taratýǵa múmkindik berip qoıǵandyǵymyz týraly aıtyp otyrmyn», - dedi N. Ermekbaev forým aıasynda sóılegen sózinde.

Sondaı-aq, mınıstr Qazaqstannyń mádenıetter men dinderdi jaqyndastyrý  jáne halyqtardyń turaqtylyǵy men ózara túsinistigin  qamtamasyz etý maqsatynda Shyǵys pen Batys arasyndaǵy dıalogty damytýdaǵy Qazaqstan basshysynyń bastamalary týraly aıtty.

«Qazaqstan Prezıdentiniń jahandyq bastamalary qatarynda 2003 jyldan beri bizdiń elordamyz – Astana qalasynda  úsh jylda bir ret ótetin Álemdik jáne dástúrli dinder kóshbasshylarynyń sıezerin ótkizý erekshe oryn alady. Bul halyqaralyq forýmnyń maqsaty - jahandyq jáne óńirlik qaýipsizdikti qamtamasyz etý tetikteriniń biri retinde mádenıetter men órkenıetter dıalogyn damytý.  Osy jyldar ishinde qazaq jerinde dástúrli dinderdiń  5 ret sezi  ótkizildi, jáne onyń aıasynda  asa mańyzdy qujattar qabyldandy», - dep atap ótti Nurlan Ermekbaev.

Aıta keteıik, forým jumysyna búkil álemniń 500-den astam bedeldi dinı qaıratkerleri, tanymal teologtar, saıasatkerler men qoǵam qaıratkerleri qatysýda. Forým delegattaryn Ábý-Dabıdiń murager hanzadasy sheıh Muhammed ben Zaıd Ál Nahaıan qabyldady.