Erjan Qarataıdyń myna jalǵannan urpaqsyz ótem be dep ábden toryǵyp, qyryqqa jetkende kórgen jalǵyz uly edi. Bul ómirge kelgende dúrildetip toı jasady. Ólgende kórgen jalǵyz uldan eshteńe aıamady. Betinen qaqpaı ósirdi. Bes jasqa kelgende ádemi velosıped, on ekige jetkende "Jıgýlı" satyp áperdi.
Qarataı ulyn bes-alty jasqa kelgende úıine kelgen qonaqtarmen birge qaq tórge otyrǵyzatyn boldy. Ol ol ma, balany araqpen aýzyzdandyra bastady. "Áı, Qarataı, munyń ne japyraqtaı balaǵa araq ishkizip! Erteń alqash bolyp shyqpaı ma?"- degen qarttardyń sózderine pysqyrǵan da joq. "Jalǵyz uldan nemdi aıaımyn. İshsin. Jesin. Kısin. Ómirdegi qyzyqtyń bárin kórsin. On segizge tolǵan kúni tipti qatyn alyp beremin",- dep bósetin ondaıda Qarataı.
"Uıada ne kórseń, ushqanda sony ilesiń" degen yp-ras eken. Erjan jóndi oqymady. Sonda da bolsa mektepti ildáldalap bitirgen ulyn Qarataı aqshanyń kúshimen Almatydaǵy joǵary oqý oryndarynyń birine túsirdi de jiberdi.
Erjan ýnıversıtetke sheteldiń mashınasymen keledi. Qalta tolǵan býda-býda aqsha. Únemi ashqursaq júretin kýrstastaryna ishkizedi, jegizedi. Olar máz. Sovhoz dırektory bolyp isteıtin ákesiniń dáýleti jetedi. Sońǵy jyldary bir aýdanǵa ákim bolǵan Qarataı endi tipten dúnıeniń betine qaramaıtyn boldy.
Jalǵyz ul barǵan saıyn ońbady. Birde bireýdiń mashınasyn soqsa, endi birde tóbelesip mılısıaǵa túsip qalady. Onyń bárine áke baıǵus júgiredi. Áıteýir qudaıǵa shúkir, tanys jetedi. Qazir bári satylatyn zaman ǵoı. Aqsha berip júrip báriniń tigisin jatqyzady.
Sóıtip júrgende Erjan úılenetin boldy. Áke-sheshede jan qalǵan joq. Dúrildetip qalanyń qaqortasyndaǵy "Almaty" restoranynda toı jasady. Toıǵa kileń yǵaı men syǵaıdy shaqyrdy. Átteń, óziniń úılený toıynda mas bolyp qalyp Erjan uıat istedi. Stoldardy aýdardy ma-aý, daıashyny urdy ma-aý, áıteýir istemegeni joq. Qarataı ulyn áke-kókelep azar úıge jetkizdi.
Erjan sońǵy mezgilde araqsyz tura almaıtyn halge jetti. İshedi de júredi. Ákesi eki-úsh ret emdetip te kórdi. Bolmady. Bir-eki aı ishpeı júredi de qaıtadan baıaǵy ánine basady. Alpysqa jaqyndaǵan Qarataı endi shyndap qaýiptene bastady. "Eger jazataıym birdeńege ushyrap ólip qalsa she?" degen sumdyq oı sanasynan ketpeıtin boldy. Sonda bul dúnıeden urpaqsyz ótedi ǵoı. Myna jıǵan qyrýar dúnıe-múlik, asyl jıhaz, altyn, aqsha kimge muraǵa qalmaq?

Myń kún synbaǵan shólmek shart etip bir kúni syndy. Erjannyń óli denesin úıine ákelgende saǵat túngi on eki edi. Restoranda bir jigitpen eregisip, taban astynda úsh lıtr araq ishýge bástesken Erjan sońǵy bótelkeni qolyna ustaǵan kúıi o dúnıege attanyp kete barypty.
Jalǵyz uldan aıyrylǵan áke qaıǵysyn tilmen aıtyp jetkizý kıyn edi. Sheshesi aýrýhanaǵa túsip qaldy. Jalpaq dúnıede jalǵyz qalǵan Qarataı ońashada qabyrǵasy sógilip turyp ulynyń sýretimen syrlasady. "Seniń ómirden qyrshyn ketkenińe men, men ǵana kinálimin. Seni araqpen aýyzdandyrǵan men. Seniń ornyńa men ólýim kerek edi, qulynym. Endi ne isteımin? Tuldyr tuıaqsyz qaldym ǵoı, balam-ay. Erjanym-aý!" Kenet daýys salyp jylaǵysy keldi. Kózinen jas shyqpady. Biraq ishi-baýyry ezilip barady. Kózi móldiregen ádemi jigit sýretten buǵan jymıa kóz salady. Muny túk te kinálap turmaǵan sıaqty...