Búgin Qyrǵyzstan prezıdenti Sooronbaı Jeenbekov Astanaǵa resmı saparmen keldi, dep habarlaıdy Qamshy.kz aqparat agenttigi.

Sapary barysynda Jeenbekov Qazaqstan prezıdenti Nursultan Nazarbaevpen jeke kezdesti. Kezdesýde Elbasy qyrǵyz basshysynyń saparyna aq jol tilep, eki eldiń dostyq qarym-qatynasynyń máńgi saqtalýyna senim bildirdi.

«Meniń shaqyrýymmen resmı saparmen bastaǵan jolyńyz aq bolsyn, qutty bolsyn. Bastaǵan jolymyz eki eldiń dostyǵy men bolashaǵyna jumys istesin. Sizderdi qýanyshpen qarsy alamyz. Siz bastap kelgen qyrǵyz delegasıasynyń árbir máselesin sheshýge Qazaqstan ár ýaqytta daıyn. 26 jyl táýelsizdikte ómir súrip kelemiz.

Qazaqstan eshqashan Qyrǵyzstanǵa sóz tıgizip, jamanshylyq qadam jasaǵan emes. Biz kelemiz, ketemiz, al eki el kórshi bolyp qalady. Burynnan solaı jalǵasyp keledi. Sondyqtan ár býynnyń boıyndaǵy jiger sol jaqsylyqty, dostyqty qarym-qatynasty taza kúıinde kelesi býynǵa tapsyrady», - dedi Nazarbaev.

Sondaı-aq jaqynda ǵana prezıdent bolǵan Jeenbekovke tilegin aıtty.

«Búkil halyq bolyp sizdi saılady, senim bildirdi. Sol senimdi aqtaýyńyzǵa Alla kúsh-qýat bersin!», - dedi memleket basshysy.

Óz kezeginde, Sooronbaı Jeenbekov jyly shyraımen qarsy alǵan Nursultan Nazarbaevqa alǵysyn jetkizdi.

«Bizdi jyly shyraımen kútip aldyńyzdar. Prezıdent bolyp saılanǵanda jaqsy tilegińizdi bildirdińiz. Biz úshin syıly azamatsyz. Ár aıtqan tilegińiz úshin alǵys aıtamyn.

Eki eldiń dostastyǵy aıasynda aıanbaı eńbek etemin dep ýáde beremin!», - dedi Jeenebekov.  

Qazir qos memleket basshysy keńeıtilgen quramda kelissóz júrgizip, Eýrazıa ekonomıkalyq odaǵy (EAEO) aıasyndaǵy yntymaqtastyq máselelerin talqylaýda.