Jaqynda dúnıege úshem ákelgen qaraǵandylyq otbasy "bıliktiń nazarynan tys qaldyq, zarymyzdy ákim tyńdamaı otyr" dep narazylyǵyn bildirýde.

Bosanǵan kúnnen-aq kómektesýge ýádeni úıip tókken jergilikti atqaminerler, tipti kelip quttyqtaýǵa da jaramaǵan dep habarlaıdy "31 arna".

Toǵyz adamnan turatyn kópbalaly otbasy qazir eki bólmeli páterdi panalaýǵa májbúr. Birden kópbalaly ana atanǵan Leıla Eıýpova ýaqytynan bir aı buryn bosanǵan. Qazir óziniń de, úshemderdiń de jaǵdaıy jaqsy.

Sózderinshe tek uzaqqa sozylǵan joqshylyqtan otbasynyń úsh birdeı sábıge tósek alýǵa qaýqary jetpeı tur. Al memleketten bólinetin jalǵyz járdemaqy qunarly tamaqpen jórgektergede jetpeıdi.

"Úsh balamdy da bir kereýetke jatqyzýǵa májbúrmiz. Sebebi úsh kereýet, úsh koláska alýǵa bizdiń qarajatymyz joq. Al ákimshilik kómektespek túgili tipti quttyqtaǵan da joq", - deıdi úshemniń anasy Leıla Eıýpova.

Toǵyz adamnyń eki bólmeli páterdi panalaýdan basqa amaly joq. Tar páterlerin keńeıtýdi surap kópbalaly otbasy ákimshilikke de barǵan. Biraq bir-birine siltegen sheneýnikterden aqyry qaıran bolmapty. Buǵan da kóndikken olar tym quryǵanda qarjylaı kómek kórsetse eken deıdi.

"Balalardyń ákesi Astanaǵa aqsha tabý úshin ketti. Úıdiń jalǵyz asyraýshysy sol ǵana. Balalaryn kórmegenine eki aı boldy. Ákimdiktegiler kómektesemiz degen", - dedi úshemniń ájesi Nısa Aıýpova.

Al úshemderdi umyt qaldyrǵan jergilikti atqaminerler baspana joq dep, otbasyǵa kezekten tys páter tımeıtinin aıtty. Toıyp isher tamaǵy da joq januıaǵa, tipti áleýmettik kómektiń de kórsetilmeıtinin eskertedi.

"Óziniń turǵyn úı máselesin jaqsartý, keńeıtý deımiz ǵoı, ol tek qana qatty juqpaly aýrýmen aýyratyn adamdaryn úkimettiń bekitilgen tizimderdiń ishindegi aýrýlarǵa ǵana bolady", - deıdi "Qaraǵandy qalasynyń turǵyn úı qatynastar bólimi" MM basshysynyń orynbasary Daryn Bulqaıyr.

Degenmen úshemderdi dúnıege ákelgen otbasy páter kezegine turýǵa da daıyn. Tek halyq sanyn kóbeıtip, kópbalaly otbasy atanǵanymdy úkimet elese ıgi edi deıdi. "31"