Dárigerler Jambyl oblysynda apatqa ushyraǵan An-2 ushaǵynan aman qalǵan jolaýshynyń jaǵdaıy jaqsaryp kele jatqanyn aıtty dep habarlady "QazTAG".

"Ásem Shaıahmetova keshe saǵat 19.00-de qalalyq aýrýhanaǵa TJM jelisi boıynsha jedel-járdem kóligimen jetkizildi. Aýrýhanaǵa túsken kezde jaǵdaıy aýyr bolatyn, biraq esin jınaǵan edi. Súıekteriniń synýy saldarynan kóp qan joǵaltqan. Oǵan aýrýhanaǵa túsken sátten bastap tıisti medısınalyq kómek kórsetildi, qan quıyldy. Qazir naýqastyń jaǵdaıy bir qalypty aýyr, esin jıdy. Eger qandaı da bir aýyrtpalyqtar oryn almasa, jaǵdaıy jaqsarady dep úmittenemiz", - dedi Shý qalalyq aýrýhanasynyń bas dárigeri Seısenǵazy Aqpaev telefon arqyly.

Buǵan deıin habarlanǵandaı, 2015 jylǵy 20 qańtarda saǵat 15.40-ta Jambyl oblysyndaǵy "Shatyrkól" ken orny mańynda "Balqash-SHatyrkól" baǵyty boıynsha ushyp bara jatqan An-2 ushaǵy qulaǵan bolatyn.

Ushaqta 7 adam bolǵan, sonyń ishinde 3-eýi ekıpaj múshesi. Ekıpajdyń barlyq múshesi  jáne "Qazaqmys" korporasıasynyń barlyq qyzmetkeri qaza tapty.

Kompanıanyń tek bir qyzmetkeri ǵana aman qalǵan. Ol Shý qalasynyń aýrýhanasynyń jan saqtaý bólimine aýyr halde jetkizilgen edi. Apat sebebin úkimettik komısıa tekseretin bolady. "KazTAG"

Sýret: tengrinews.kz