QR Aqparat jáne komýnıkasıalar mınıstri Dáýren Abaev qandaı oqıǵalardy Qazaqstandaǵy 2017 jyldyń basty jańalyqtary dep aıtýǵa bolatynyn atap ótti, dep habarlaıdy Qamshy.kz aqparat agenttigi QazAqparatqa silteme jasaı otyryp.
«Eń birinshi kezekte, álbette iri aýqymdy shara «EKSPO-2017» halyqaralyq kórmesiniń ótkizilgenin atap ótý kerek. Ol jaıly kóp aıtylǵandyqtan, men qaıtalamaı-aq qoıaıyn. Bul óte aıtýly oqıǵa. EKSPO aıasynda biz 6 myńǵa jýyq shara ótkizdik. Bul turǵyda kórme kezinde uıymdastyrylǵan buqaralyq-mádenı sharalardy este qaldyrýmen qatar, EKSPO-nyń ınfraqurylymdyq mura qaldyrǵanyn esten shyǵarmaý kerek. Bul - jańa áýejaı, jańa vokzal, qaladaǵy barlyq logıstıka... Qanshama meıramhanalar men qonaq úıler ashyldy. Osynyń bári qatty qýantady», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.
Mınıstrdiń aıtýynsha, kórme kezinde kóptegen kásiporyndar ashylsa, burynnan barlary qomaqty qarajat tapqan.
«Astana qalasynyń qyzmet kórsetý salasy bir jarym esege ósti. Bul óte jaǵymdy jańalyqtardan habar berip, eń bastysy adamdardyń zor tájirıbe jınaqtap, osyndaı iri ári aýqymdy sharany ótkizýdi úırengenin kórsetedi. Iaǵnı, adamdar ádette bir nemese eki kún ótetin forýmdardy ǵana emes, 3 aı boıy ótetin sharany sátti ótkizýdi úırendi», - deıdi ol.
Dáýren Abaev sonymen birge, saıası turǵyda jyldyń eń aıtýly jańalyǵy qandaı ekenin aıtyp berdi.
«Men úshin saıası turǵyda jyldyń eń basty jańalyǵy - Memleket basshysynyń bastamasymen qolǵa alynǵan saıası jáne konstıtýsıalyq reforma. Oılap qarasańyz, bıliktiń 35 ókilettiligin Prezıdent Parlament pen Úkimetke tapsyrdy. Bul Memleket basshysynyń oıly ári qýatty ustanymyn taǵy bir márte dáleldeı túsedi. Biz qazirgi ýaqytta kóptegen memleketterde bul prosester kerisinshe keri ketip bara jatqanyn kórip otyrmyz. Iaǵnı, adamdar bıliktiń ókilettiligin ózderi ıelenip jatqan jaǵdaılar jeterlik. Osy turǵyda biregeı oqıǵalardyń biri bıyl bolǵanyn atap ótýimiz kerek», - deıdi mınıstr. Dáýren Abaevtyń aıtýynsha, saıası turǵydaǵy bul ózgeris Qazaqstannyń qandaı baǵytta jyljyp bara jatqanyn kórsetetini belgi.
«Biz qoǵamdy demokratıalandyrý jolymen, prosesterdiń, sonyń ishinde saıası prosesterdiń birtindep basatyn evolúsıasy jolymen bara jatyrmyz. Bul bıliktiń barlyq tarmaǵyna zor jaýapkershilik júkteıdi. Bul oqıǵa óziniń laıyqty baǵasyn alady», - deıdi mınıstr.
Ol sonymen qatar, jyldyń aıtýly jańalyqtarynyń qataryna Jańǵyrtý 3.0 baǵytyn qosty. «Bul qazirdiń ózinde jemisin berip jatqan ekonomıkalyq reformalardyń tizbegi. Úkimet jyldyń sońynda esep berip otyrady. Elimizde ishki jalpy ónimniń kólemi artyp keledi. Bul tek qana memleket úshin ǵana emes, turǵyndar men ınvestorlar úshin de jaqsy sıgnal. Bul bizdiń durys baǵytta kele jatqanymyzdy kórsetedi», - dedi mınıstr.
Dáýren Abaev, sondaı-aq, Qazaqstannyń BUU Qaýipsizdik Keńesinde turaqty emes múshe retinde jumys istep jatqanyn da baǵalap ótti.
«Biz búkil álemniń qaýipsizdigine úlesimizdi qosyp kelemiz. Mańyzy aldyńǵylardan kem túspes jańalyqtardyń biri - Qazaqstan men Memleket basshysynyń bitimgerlik jolyndaǵy bastamasy. Ol - Astana prosesi. Sırıa máselesi sekildi ózekti iske kelgende Astananyń bitimgershiliktiń ortalyǵyna aınalýy - dıplomatıamen aınalysatyn adamdardyń naqty kásibı turǵyda baǵasyn alady. Meniń atap óter negizgi degen jańalyqtarym osy. Ár salada aıtýly jańalyq bar. Fýtbol jankúıeri retinde kúzgi eýropalyq kezeńnen sátti ótkenimiz meni qýantady. Men osy sátti paıdalana otyryp, búkil qazaqstandyqtarǵa keremet syı jasaǵan «Astana» fýtbol klýbyna alǵys bildirgim keledi», - deıdi mınıstr.
Dáýren Abaev «Astana» fýtbol klýbyna kelgende bir ǵana sanǵa mán berýdi erekshe atap ótti. «Umytpasam, birneshe maýsym buryn «Astana» fýtbol klýby 450-shi orynda turǵan edi. Al qazir shamamen 63-shi orynda. Demek, az ǵana ýaqyttyń ishinde «Astana» 300-ge jýyq baspaldaqty attap ótti. Bul shynynda da, qoshemet pen maqtaýǵa laıyq kórsetkish», - dep túıdi sózin mınıstr.
