Elimizde jańa jyldan bastap medısınalyq saqtandyrý jarnalaryn aýdarý erejesi ózgeredi, dep habarlaıdy Qamshy.kz aqparat agenttigi Sputnik.kz saıtyna silteme jasaı otyryp.
Qazaqstanda 1 qańtardan bastap salyq salý máseleleri jónindegi túzetýler kúshine endi, oǵan sáıkes mindetti áleýmettik medısınalyq saqtandyrýdy engizý 2018 jyldyń 1 qańtarynan 2020 jylǵa aýystyrylady.
2017 jyldyń 1 shildesinen bastap aı saıynǵy jarna jasaýdy bastaǵan jumys berýshiler saqtandyrý keıinge qaldyrylǵanyna qaramastan, óz qyzmetkerleri úshin aqsha tóleýdi jalǵastyra beredi. 2017 jyly olar qyzmetker jalaqysynyń 1%-yn tólese, bul soma 2018 jáne 2019 jyldary 1,5%, 2020 jyly 2%, 2022 jyldan keıin 3%-ǵa artady. Sonymen birge, eger qyzmetker jeńildik berilgen sanattardyń birine kiretin bolsa, aýdarym jasaýdyń keregi joq. Jeńildik sanatyndaǵy azamattarǵa memleket tólem jasaıdy.
Áleýmettik medısınalyq saqtandyrý qorynyń basshysy Elena Bahmýtovanyń aıtýynsha, sonymen birge jumys berýshiler úshin memlekettik áleýmettik saqtandyrý qoryna aýdarymdar kólemi 5%-dan 3,5%-ǵa tómendeıdi. Sáıkesinshe, jumys berýshi qyzmetker tabysynyń 1,5%-y kólemindegi aıyrmany áleýmettik medısınalyq saqtandyrý qoryna aýdarady.
Jeke kásipkerler, jeke notarıýster, advokattar men kásibı medıatorlar 2018 jáne 2019 jyldary ózderine jarna tólemeıdi. Degenmen 2020 jyldyń 1 qańtarynan bastap eki eń tómengi jalaqynyń 5%-yn tóleıdi.
Jumys berýshiler sekildi olar da óz qyzmetkerlerine 2017 jyldyń 1 shildesinen bastap aı saıynǵy jarna jasaýdy bastady.
Azamattyq-quqyqtyq sıpattaǵy kelisimshart negizinde jumys isteıtin jeke tulǵalar 2020 jyldyń 1 qańtarynan bastap kelisimshart merzimi ishinde aı saıyn tóleıdi. Jarna kólemi 2020 jyly kelisimshart boıynsha alynǵan tabystyń 1%-yn, 2021 jyly 2%-yn quraıdy.
Jaldamaly qyzmetkerlerdiń tabysynan jarnany jumys berýshiler ustap qalyp, tóleıdi. 2017 jyldyń 1 shildesinen bastap jaldamaly qyzmetkerler úshin jumys berýshi aýdarym jasap keldi. Sonymen qatar, 2020 jyldyń 1 qańtarynan bastap jumys berýshi aı saıyn olardyń jalaqsynan jarna ustap qalyp, áleýmettik medısınalyq saqtandyrý qoryna aýdarady: ol 2020 jyly jalaqynyń 1%-yn, 2021 jyly 2%-yn quraıdy.
Eger azamat jeńildik sanatyna jatatyn bolsa, oǵan memleket tóleıdi. Memleket 14 sanatqa kiretin azamattardy tegin saqtandyrady: olardyń arasynda balalar, jumyssyzdar, jumys istemeıtin júkti áıelder, úsh jasqa deıingi balasy bar jumys istemeıtin tulǵalar, múgedekter, jumys istemeıtin oralmandar bar.
Turaqty jumysy joq jáne jeńildikti sanatqa kirmeıtin jeke tulǵalar 2020 jyldyń 1 qańtarynan bastap ózi úshin aı saıyn 1 eń tómengi jalaqynyń 5%-y kóleminde jarna tóleıdi.
