Búgin 93 jasqa qaraǵan shaǵynda jazýshy, Qazaqstan Jazýshylar odaǵynyń múshesi Ádiham Shilterhanov dúnıeden ótti. Bul týraly jýrnalıs Tórebek Baıtasov óziniń Feısbýktegi paraqshasynda jazdy, dep habarlaıdy Qamshy.kz aqparat agenttigi.

Soǵys jáne Eńbek ardageri Ádiham Shilterhanov 1925 jyly 27 shildede Ońtústik Qazaqstan oblysy, qazirgi Ordabasy aýdanynyń «Tórtkúl» aýylynda týǵan. 

1961 jyly Almaty Aýyl sharýashylyǵy ınstıtýtyn bitirgen. Eńbek jolyn 1943 jyly Tórtkúldegi orta mektepte muǵalimdikten bastaǵan. 

1943–1944 jyldary dańqty Panfılov atyndaǵy 8-gvardıalyq dıvızıanyń quramynda Uly Otan soǵysyna qatynasyp, elge aýyr jaralanyp oraldy. 

1945–1969 jyldar arasynda Báıdibek aýdanynda muǵalim, aýdandyq partıa komıtetinde nusqaýshy, Krasnaıa-Nıva ujymsharynda partıa komıtetiniń hatshysy, odan keıin sol ujymshardyń tóraǵasy qyzmetterin atqardy. 

1969–1985 jyldary Otyrar aýdanyndaǵy «Arys» ujymsharynyń dırektory, aýdandyq turmystyq qajetti óteý kombınatynyń dırektory bolyp jemisti eńbek etti. 1985 jyly zeınetkerlikke shyqty.

1988 jyly «Jalyn» baspasynan «Úsh báıterek», 1993 jyly «Aqjaldyń aqyry», 1995 jyly «Atamura» baspasynan «Ataly sózder», 1995 jyly «Raýan» baspasynan «Sattar Erýbaev» atty kitaptary jaryq kórdi.

2000 jyly «Ordabasy» baspasynan shyǵarmalarynyń 2 tomdyǵy basylyp shyqty. Qazaq KSR Joǵary Keńesi Prezıdıýmynyń Qurmet Gramotasymen, İ dárejeli Otan soǵysy ordenimen, kóptegen medaldarmen marapattalǵan.