Forbes Kazakhstan jýrnaly Qazaqstan prezıdenti Nursultan Nazarbaevtyń kúıeý balasy, «Atameken» ulttyq kásipkerler palatasynyń tóraǵasy Tımýr Qulybaevty «Jyl kásipkeri» retinde tanydy, dep habarlaıdy Baq.kz.

«ALMEKS» jáne «Kıpros» kompanıalary ıeleriniń biri Tımýr Qulybaev 2017 jyly Qazaqstandaǵy «eń yqpaldy» 50 kásipkerdiń kóshin bastap tur. Qulybaev sońǵy ret budan bes jyl buryn Qazaqstandaǵy «eń yqpaldy» kásipker atanǵan.

Basylym Qulybaevtyń yqpalynyń artýyna Kazkommersbank pen «Halyq banktiń» birigýi, «saqtandyrý naryǵyndaǵy pozısıasynyń kúsheıýi, avıasıa salasy men medısına bıznesinde tabysqa jetýine» úles qosqanyn aıtady. Qulybaev majorıtarlyq aksıoner sanalatyn Gemini Mining B.V. kompanıasy 2016 jyldyń sońynda iri temir ken ornyn ıgeretin «Aqtóbe Temir BC enshiles kásiporny» kompanıasyndaǵy 50 paıyz úlesin Qazaq Mining Llp kompanıasyna ondaǵan mıllıon dollarǵa satqan.

Buǵan qosa, Qulybaevtyń «Almeks Plús» kompanıasy 49 paıyz aksıasyna ıe «Kazakhstan Petrochemical Industries Inc.» (KPI) kompanıasy 2016 jyly qyrkúıekte Shanhaıda Qytaıdyń Memlekettik damý bankimen Atyraý oblysynda alǵashqy birikken gaz hımıasy zaýytyn salý jobasy boıynsha nesıe kelisimin jasasqan.

Forbes Kazakhstan Qazaqstan prezıdenti Nursultan Nazarbaevtyń qyzy men kúıeý balasy erli-zaıypty Dınara jáne Tımýr Qulybaevtardyń árbiriniń dáýletin 2,1 mıllıard dollarǵa baǵalaıdy.