QR Salyq kodeksine qyzmetin toqtatqan ÚEU-dy joıý úderisin jeńildetýge baǵyttalǵan túzetýler engizildi dep habarlaıdy Qamshy.kz aqparat agenttigi.
Qazaqstan Respýblıkasynyń jańa Salyq kodeksine sáıkes (2017 jylǵy 25 jeltoqsanyndaǵy № 120-VI QRZ) Memlekettik kirister organdary tarapynan sottyń sheshimi boıynsha zańdy tulǵalardy joıý úshin qabyldanatyn sharalar tizbesi keńeıtilgen. Osylaısha, memlekettik kiris organdary Qazaqstan Respýblıkasynyń Azamattyq kodeksimen retteletin tórt negiz boıynsha zańdy tulǵalardyń qyzmetin toqtatý týraly sotqa shaǵym bere alady, atap aıtqanda olar: bankrottyq, zańdy tulǵanyń tirkelýiniń jaramsyz dep tanylýy, ornalasqan jeri nemese naqty meken-jaıy boıynsha zańdy tulǵanyń bolmaýy, zańdy óreskel buzý arqyly qyzmetin júzege asyrýy.
Qazaqstan Respýblıkasy Din isteri jáne azamattyq qoǵam mınıstrliginiń málimetine sáıkes, burynǵy Salyq Kodeksi sheńberinde zańdy tulǵanyń, sondaı-aq, ornalasqan jerdegi nemese naqty meken-jaıdaǵy quryltaıshylardyń bolmaýy ÚEU-dy joıýǵa kedergi bolatyn sebepterdiń biri bolatyn. Quryltaıshylar óz uıymdarynyń qyzmetin erikti túrde toqtatpaı, basqa elge qonys aýdaryp ketken jaǵdaılar oryn alǵan. Atalǵan túzetý memlekettik kiris organdarynyń ornalasqan jerinen tys zańdy tulǵalardy joıý jónindegi sharalardy qabyldaýǵa múmkindik beredi.
Sondaı-aq, jańa Salyq kodeksiniń 93-shi babyna sáıkes salyq tóleýshilerdiń qyzmetin májbúrli túrde toqtatý tártibi kózdelgen. Májbúrli túrde toqtatýǵa belgili bir talaptar júktelgen jumysyn toqtatqan zańdy tulǵalar jatady. Mysaly, Salyq kodeksimen belgilengen shekteýli kezeńnen kem emes (5 jyl) zańdy tulǵalar salyq eseptemesin usynbaǵan, qarjy mámilelerin jasamaǵan, QQS tóleýshi retinde tirkelmegen, áleýmettik tólemder boıynsha qaryzdary joq jáne t.b zańdy tulǵalar kiredi. Salyq organy 93-baptyń talaptaryna sáıkes keletin sýbektilerge turaqty túrde monıtorıń júrgizip otyrady jáne tıisti sharalardy qabyldaıdy.
Qazirgi ýaqytta Qazaqstanda tirkeýge qatysty másele týdyratyn kóptegen qyzmetin toqtatqan ÚEU bar, atalǵan uıymdar óz kezeginde azamattyq sektordy damytýǵa qatysty statısıkalyq jáne basqa da kórsetkishterdi burmalaýǵa ákeledi. Memlekettik kiris Komıtetiniń málimetine sáıkes, 2 919 úkimettik emes uıym resmı emes dep tanyldy, al tirkelgen ÚEU-dyń jalpy sany - 19860.
Tutastaı alǵanda, qabyldanǵan normalar jumysyn toqtatqan zańdy tulǵalardy, sonyń ishinde ÚEU-dy joıý úderisterin aıtarlyqtaı jeńildetedi, sondaı-aq olardyń statısıkasynyń qalyptasýyna oń áserin tıgizedi- dep habarlady QR Din isteri jáne azamattyq qoǵam mınıstrligi.
