Júrsin Erman men Muhamedjan Tazabektiń tóńiregine toptasqan aqyndar bir sahnada otyryp aıtysqysy kelmeıtin jaǵdaıǵa jetken. Bul týraly KTK jańalyqtary habarlady, dep jazady Qamshy.kz aqparat agenttigi.

Dala parlamentine balanǵan aıtys tóńireginde qazir talas-tartys órship tur. Tól ónerdiń tony teris aınalyp, top-topqa bólingen aqyndar árkimniń soıylyn soǵyp júr degen áńgime el arasynda jeldeı esken. Qyzyl sózdiń sheshenderi halyqtyń muń-muqtajyn jyrlaýdyń ornyna, bir qazanda bastary pispeı júrgenin Júrsin Erman da moıyndaıdy. Bir úıdiń balasyndaı bolǵan dúldilder qazir bir sahnada otyryp aıtysýdan qalyp barady.

«Qazaqstan qoǵamy qandaı, aqyndar da sondaı. Bizdiń de aqyndardyń arasynda dinı teris baǵytqa túsip ketken, dástúrli ózimizdiń dindi ustanbaıtyn aqyndar paıda boldy, tórteý-beseý. Biraq, olardyń qolyna aıtys sekildi asa qudiretti ónerdiń tizginin ustatyp jiberip, aıtysty dinge qaraı jolǵa salyp jiberý óte qıanat bolady», - deıdi Júrsin Erman.

Shynynda da qazir keıbir aqyndardyń tek din tóńireginde tolǵanyp, aıtystyń ajaryn qashyryp júrgeni týraly aıtylyp júr. Tipti saqaldylar birigip óz aıtystaryn uıymdastyratyn bolǵan deıdi sol aıtystyń basy qasynda júrgen aqyndar. 

«Eger basqasha oılaıtyn aıtysker-aqyndar bolsa, eger joq biz bularǵa qosylmaýymyz kerek, biz bulardyń qatarynan emespiz, biz ózimiz bólekpiz deıtin bolsa,ondaı adamdy tek qana aıtysker aqyn emes, jalpy Qazaqstan memleketine qaýipti adam dep esepteımin. Taza ultqa paıdasy bar osyndaı qazaqtyń arda óneri jalǵyz qazir qalǵan qadirli kórermen jınaı alatyn dástúrli ónerine jik salý ol qazaqqa qarsy jasalǵan qylmys dep oılaımyn», - dep pikir bildirdi aıtysker Rınat Zaıytov.

Osydan jeti jyl buryn aıtys aqyndary men jyrshy-termeshilerdiń halyqaralyq odaǵy qurylyp, oǵan Júrsin Erman tóraǵa bolyp saılanǵany este. Bul uıym bes márte «Altyn dombyra» saıysyn uıymdastyryp, úzdik aqyndardy anyqtaǵan eken. Alaıda halyqtyń qyzyǵýshylyǵyn oıatqan bul jarystan bıyl biraz myqty aqyndar shet qalypty.

Júrsin Erman:

«Altyn dombyradan» aıyrylyp qalǵan soń, Aqtóbede ótken ońasha, shamaly aqyndar qatysqan. Buryn aıtysqa qatyspaǵan bıylǵy jyldyń, aqyndar arasynda ótken «Altyn dombyra» saıysy bizdiń kóńilimizdi kónshitpedi. Sondyqtan, bizdiń birde bir odaqtyń músheleri baryp qatysqan joq».

Qazir halyq arasynda Sara Toqtamysova, Balǵynbek Imashev, Syrym Áýezhan, Jandarbek Bulǵaqov sekildi sáıgúlikterdiń Muhamedjan Tazabektiń janyna toptasqany týraly áńgime bar. Iaǵnı jyr dúldilderi jikke bólinip, Júrsin men Muhamedjannyń soıylyn soǵyp júr deıdi kópshilik. Biraq, Muhamedjan Tazabektiń ózi bul oımen túbegeıli kelispeıdi.

«Dinge baılanysty bólinýshilik aıtysta bolǵan emes negizinen. Kóp jaǵdaıda degen shyǵar, solaı shyǵar, solaı bolýy múmkin degen joramaldarmen el arasynda sondaı túsinik qalyptasyp qaldy. Áıtpese, aıtys tóńireginde bolyp jatqan daý damaıǵa dinniń esh qatysy joq negizi», - dedi Muhamedjan Tazabek.

Jyl boıy jyr báıgesinde qamshy saldyrmaǵan aqyndardyń bıyl «Altyn dombyradan» alshaqtap qalǵany kóńilderine qaıaý túsirgen. Sondyqtan Júrsin Erman jeltoqsannyń 29 men 30-ynda óz júırikterin jınap Almatyda aıtys ótkizdi. Osylaısha qazaq ultyna tán ulttyq ónerdi týlaqsha tartyp, árkim ózinshe aıtyp uıymdastyryp álek.