"Qazaqkonsert" óner birlestiginiń bas dırektory Asqat Maemırov Erlan Biláldi qorǵap Instagram paraqshasyna jazba qaldyrdy, dep habarlaıdy Qamshy.kz aqparat agenttigi.
"Erlan Bilál - belgili teatr jáne kıno akteri, ónerimen, óziniń azamattyq tulǵasymen sańlaq aǵalarymyz ben apalarymyzdy tamsandyryp, zamandastary men dostaryn, ini-qaryndastaryn moıyndatqan, teatrdyń Analarynyń aq batasyn alǵan jany da, ary da taza azamat! Saxna men ekrannyń sáni bolǵan Erlannyń symbaty men únine, somdaǵan beınelerine ulty uıydy, eli eltidi, kórermeni tebirendi. Qandaı beıneler edi?! Syrym, Kebek, Qozy, Álibek, Úkili Ybyraı, Balýan Sholaq, Hakim Abaı, Muqaǵalı, Shámshi - bulardyń barlyǵy Erlan Biláldiń tek akter emes, adamı maxabaty men janynyń bir bólshegine aınalyp ketti. Olaı bolatyn jóni de bar. Ájeniń áldıin tyńdap ósken, Ákeniń taǵylymyn boıyna sińirgen, Ananyń aq sútin emgen adal ul - Erlannyń ózegi myqty, tamyry tekti. Táýelsiz Qazaqstannyń akterlik ónerinde qubylys ispettes Erlan Bilál jıyrma alty jyldyń ishinde óziniń shyǵarmashylyǵymen, somdaǵan xalyqtyq keıipkerlerimen - Ulttyq Rýxtyń xrestomatıasyn jazysty. Ómirlik serigi Maıgúl ekeýi ulyqty uldar men qylyqty qyz tárbıelep otyrǵan ónegeli otbasynyń ıesi. Nemere súıip otyrǵan ardaqty Ata. Bilálovter otbasynda keremet úılesim bar. Ony dostary retinde óz kózimizben kórip, kýá bolyp ta júrmiz", - dedi ol.
Asqat Maemırov Biláldi bireý aıaqtan shalýy múmkin ekenin aıtty.
"Azamattyń basyna syn saǵat túskende tabalamaǵan, dattamaǵan, kústánalamaǵan xalyqtyń perzenti edik. Erlannyń abyroıy - ónerde júrgen zamandas, qurdas, dos-baýyr bárimizdiń abyroıymyz! Abyroıymyzǵa asyǵys pikir aıtyp, las jaqpaıyq degim keledi. Uıyp otyrǵan ujymyn shýlatyp, shańyraǵyn jylatyp "Migittiń" isin jasaǵan kisiniń kim ekenin bilmeımin! Tanyǵym da kelmeıdi! Erlandy orǵa jyqqysy kelgen pendeniń de Alladan alatyn jazasy bar! Azamatty aıaǵynan shalý - ultty ósirmeıdi! Ómirde eshkimge jamandyq oılamaıtyn Erlandy dál qazirgi sátte jigerlendirgim keledi. Basyńa bult úıirilgen osy sátte, Seni qorǵamasaq - bizdiń kim bolǵanymyz! Jer basyp júrgen pendeler - Adam taǵdyry oıynshyqqa aınalmaýy tıis! Tabalaıtyn da tabylar, kúletinder de tabylar! Bireýge jamandyq tileý - jaqsylyqqa aparmaıdy! Erteń aldynan ne kútip turǵanyn eshkim de bilmeıdi. Tek óner áleminde ǵana emes, bizdiń qazaq qoǵamynda meıirim men adamı maxabat saltanat qursa eken, ylaıym! Meıirimdi bolaıyqshy, Bárimiz! Erlan - Qazaqtyń Asyl Azamaty!" - dep jazdy Maemırov.
Esterińizge salaıyq, Muhtar Áýezov atyndaǵy Qazaq memlekettik akademıalyq drama teatrynyń dırektory Erlan Bilál 1,5 mıllıon teńge para almaq boldy dep aıyptalyp jatyr.
