Para alyp ustaldy degen aıyp taǵylǵan Erlan Biláldiń isine qatysty Jazýshylar odaǵynyń tóraǵasy Nurlan Orazalın pikirin bildirdi, dep habarlaıdy Qamshy.kz aqparat agenttigi.  "Erlan bireýge senip, qurban bolyp otyr" dep atap ótti tóraǵa.

Jazýshylar odaǵynyń tóraǵasy, qoǵam qaıratkeri, qalamger bul jaıynda búgin Almaty qalasynda ótken baspasóz konferensıasynda aıtty.

 "Osy teatrymyzdyń bas ıesi retinde, keshegi alyptarymyzdy kórgen, arystarymyzdyń aldynan dáris alǵan ulttyń uly ordasyn XXI ǵasyrdaǵy jańa býynǵa, jańa urpaqqa aman-esen tapsyrsaq dep jumys istep júrgen aqsaqalymyz Asekeń telearnadan jón sózin aıtty. Biz Erlandy biletin adambyz, men ony eń alǵashqy rólinen bastap, teatr ónerine qalaı kelgenin bilemin, Alladan bitken ǵajap talantyna qýanyp júretin aǵalarynyń biri edim. Erlan kóz aldymyzda ósti. Erlan bireýdiń ala jibin attady degendi Atyraý men Altaıdyń arasynda jatqan 70 teatr qaýymy senbeıdi. Erlan taza qalpy, óziniń aqkóńil bolmysymen, sengishtigimen qurban bolyp otyrǵan sekildi. Talant táńirden deıdi, talant ulttyń, halyqtyń qazyna baılyǵy. Ónerde qubylys bolyp baǵalanǵan, júıirik akterimizdiń bizdi qıyndyqqa dýshar etip otyrǵany janymyzǵa batady. Zańnyń aldynda bárimiz birdeımiz. Biraq zań bar eken dep demalysta júrgen teatrdy qolmen senarı jasap osyndaı jaǵdaıǵa dýshar etý kisiliktiń turǵysynan da, ómir tirshiliktiń turǵysynan da kóńilge qona qoıatyn nárse emes. ", - deıdi ol.

Eske sala keter bolsaq, M.Áýezov atyndaǵy drama teatrynyń dırektory Erlan Bilál 1,5 mıllıon teńge kóleminde para aldy degen aıyppen ustalǵan bolatyn.