Tóreǵalı Tóreáliniń mýyzkalyq prodúseri Jan Muqanov ánshi jaıynda shyndyqtyń bir betin ashty, dep jazady Qamshy.kz aqparat agenttigi. Bul týraly prodúser Telegram jelisinde jazdy.

Postty ánshiniń túbine jetý úshin jazylmaǵanyn da eskertti. 

«Biz ishki máseleni syrtqa jaımaımyz dep kelisken edik. Alaıda sońǵy kúnderi ortaq tanystarymyzdan estip jatqan qaýesetterge qarap, ol óz sózinde turmaǵanyn, óz "baýyryna" sóz tıgizgenin ańǵardym. Men úndemegen saıyn jurt onyń aıtqandaryna senedi. Biraq, onyki durys emes.

Men bar jaǵdaıdy kóńilge tıgizbeı jumsaq túsindirýge tyrysamyn», - dep bastady Jan Muqanov.

«Biz Tóreǵalı ekeýmiz 2015 jyly «Jigitter» kvartetiniń konsertinde tanystyq. Ol ýaqytta Tóreǵalıdi eshkim tanı qoımaıtyn. Meırimdi, jyly júzdi, mádenıetti joǵary qoıatyn adamdy kórdim!

Respýblıka saraıynda alǵashqy jeke konsertin uıymdastyrý jaıly usynys aldym. Kóp oılanbastan kelistim. Dál qazir Shymkent qalasyndaǵy «Rıksos» qonaqúıinde otyryp, báriniń dál osy jerde bastalǵany esime tústi. Osy jerde aıaqtaımyn da. Boldy», - deı kele Tóreǵalıdiń alǵashqy keshterimen búgingi kúnin salystyrdy.

«Men konsertti «Uly dala balasy» dep ataýdy usynǵanymda ákesi qarsy boldy, jurt túsinbeı qala ma dep shoshydy. Alaıda men kóndirdim. Sol sátten bastap bul esim Tóreǵalıdi tanytyp keledi, barlyq keshteri osy esimmen ótedi. Alǵashqy keshi keremet ótken. Ári qaraı da joǵarylaı berdik, túrli keshter, jobalar boldy. Men ol artısi maqtan tutatyn edim, maqtanatynmyn. 2 jyl ishinde onyń mártebesi artyp, úzdikterdiń qatarynan kórindi. Gonorary ósti. Alǵashynda $200-500 taýyp júrgen, bir jyldan soń $8000-dan bir-aq shyqty. Kádimgi juldyzǵa aınaldy».

Sondaı-aq Jan Muqanov aldaǵy josparlarmen de bólisti.  

«2018 jyly Qazaqstanda ǵana emes, álem boıynsha jobalardyń josparyn qurdyq. «Uly dala balasy. Álem» realıtı shoýy 7 memlekette ótedi dep josparlanǵan.

Ómirimde bir adam úshin dál osylaı jumys jasamaǵan edim. Ol adamdyǵynan aıyrylsa da, óte talantty jan. Endi meniń komandamnyń, meniń eńbegimdi bir sátte tógip jibergeni ókinishti.

Qazan aıyndaǵy josparlarǵa keletin bolsaq... Tóreǵalıdiń 5 keshin de men óz qaltamnan ótkizdim. Ótkizýdi ózim talap ettim, ol adamnyń esimin tarıhta qaldyrý – maqsatym boldy».

Prodúser Tóreǵalımen bolǵan alǵashqy túsinispeýshilikti esine túsirdi.

 «Ákesiniń minezi bárine málim, ásirese maǵan. Sol sebepti alǵashqy kúnderi-aq bizdiń isimizge aralaspaýyn ótindim. Qonaq retinde kelip, tynysh qaıtatyn. 5 kúndik kesh barysynda biz 15 000 bılet satýymyz kerek edi, ókinishke oraı 3500 – 4000 bılet satyldy. Jaǵdaıdyń múshkil ekenin túsindim. Bizge qomaqty aqsha kerek bolǵan, alaıda jınalmady, ekeýimizde de bolǵan joq. Sóıtip Tóreǵalıdan bolashaqta ótkizetin keshterden túsetin qarajatty suradym. Biraq Tóreǵalı kelispedi. Bul tek meniń ǵana máselem, ózim sheshýim kerek ekenmin.

Bul alǵashqy qońyraýym edi. Buryn sońdy mundaı kelispeýshilik bolmaǵan. Ashýǵa býlyqtym, lo adam úshin talaı jaqsylyq jasadym, ótemi osyndaı boldy.

Keıin bıletterdiń aqshasyn qaıtarǵym keldi. Eger munyń bári meniń ǵana máselem bolsa, bıletten túsken aqsha da meniki bolýy tıis. Biraq aqsha múldem jetpedi. Ol da taýyp bere almaıtynyn aıtty. Nesi bar, ózime júgirýge týra keldi.

Tipti toıynyń da bar qamyn jasamaq boldym. Aqymaq ekenmin», - dep aıaqtady Jan Muqanov.

Esterińizge sala keteıik, Tóreǵalı Tóreáliniń jeltoqsanda Pavlodarda ótken kesh barysynda kórermenderge dóreki sóılegen vıdeosy taraǵan. Ánshiniń bul áreketi halyq arasynda qyzý talqylanyp, úlken synǵa ushyrady. Erteńinde Tóreǵalı tikeleı efırge shyǵyp halyqtan keshirim surady.