Qazaqstan Prezıdenti Nursultan Nazarbaev Saýd Arabıasy koroliniń qaıtys bolýyna baılanysty osy eldiń halqyna kóńil aıtty, - dep habarlaıdy Tengrinews.kz Jedelhatta "Qazaqstan halqy koról Abdallany kóregen kósem, bedeldi saıasatker, ekijaqty yntymaqtastyqty nyǵaıtýǵa orasan zor eńbek sińirgen tarıhı tulǵa retinde árdaıym esinde saqtaıtyn bolady", – delingen.

Sonymen qatar, Qazaqstan Prezıdenti koról Abdallanyń óz ómirin Saýd Arabıasy halqyna , jalpy búkil ıslam jamaǵatynyń múddesin qorǵaýǵa, adamzattyń ádildik pen izgilik jolyndaǵy damýyna arnaǵanyn atap ótti. Dál osylaı, Nursultan Nazarbaev orny tolmas qaıǵyǵa ortaqtasa otyryp, Qazaqstan halqynyń jáne jeke óziniń atynan Salman ıbn Ábdel Ázız ál-Saýdqa jáne barsha Saýd Arabıasy halqyna kóńil aıtty.

Esterińizge sala keteıik, 23 qańtarǵa qaraǵan túni Saýd Arabıasynyń reti boıynsha altynshy koroli Abdalla ıbn Ábdel Ázız ál-Saýdtyń qaıtys bolǵany jaıynda BAQ habarlaǵan edi. Koról aýrýhanada ókpesiniń qabynýy saldarynan 91-ge qaraǵan shaǵynda qaıtys boldy.

Qazirgi tańda dástúr boıynsha onyń inisi - 79 jastaǵy salıqaly Salman ıbn Ábdel Ázız ál-Saýd Saýd Arabıasynyń jetinshi koroli atandy.

Memleket basshysy Nursultan Nazarbaevtyń tapsyrmasy boıynsha Senat tóraǵasy Qasym-Jomart Toqaev Qos kıeniń saqshysy, Saýd Arabıasy koroli Abdalla ben Ábdel Ázız ál-Saýdty jerleý rásimine qatysady. Sonymen qatar,Senat tóraǵasy Saýd Arabıasynyń jańa koroline Qazaqstannyń Prezıdenti kóńil aıtqan jeke joldaýdy jetkizedi.

Nazerke Toǵjanova Derekkóz:tengrinews.kz